Timor-Leste suspende lisensa no kaer ró xinés sira ne'ebé halo peska ba tubaraun

Governu timoroan suspende ona iha loron-sesta ne'e lisensa sira hosi ró xinés oioin ne'ebé maka deskobre halo peska ba tubaraun iha tasi timoroan nian, bainhira halo hela investigasaun sira hodi determina katak empreza kumpri ka la'e kritériu legal sira.

Ministru Agrikultura ho Peska timoroan nian, Estanislau da Silva, hatete ona ba usa katak bainhira hala'o hela investigasaun sira, ne'ebé akontese ho baze hosi informasaun sira ne'ebé fó hosi governu indonéziu, "ró sira ne'e labele sai hosi portu Carabela" iha kosta norte nasaun nian.

Nia hatete katak desizaun hodi suspende akontese tanba aspetu sira ne'ebé relasionadu ho empreza rasik no seidauk relasionadu ho atividade peska iha Timor-Leste, liuliu peska ne'ebé halo ba tubaraun tonelada resin ne'ebé konfirma iha operasaun ida ne'ebe hala'o iha fulan ne'e.

"Ami simu informasaun detalladu hosi Indonézia kona-ba kompañia no nune'e maka ha'u nu'udar ministru kompetente desidi suspende atividade sira hosi kompañia, hodi halo investigasaun detalladu kona-ba rejistu hosi ró sira peska nian no ligasaun hosi kompañia ho sira seluk ne'ebé maka envolvidu iha atividade sira peska ilegal nian", esplika hosi governante.

Nia hatete katak importante liu maka determina "katak ró sira ne'e iha envolvimentu antes iha peska legal", buat ne'ebé la permiti iha Timor-Leste, ka "sira halo mós rejistu iha liu nasaun ida, asaun ne'ebé la permiti mós".

Bainhira ró sira respeita, ka la'e, lisensa ne'ebé maka fó ona ba sira hanesan kestaun seluk ne'ebé sei determina de'it hafoin hakotu investigasaun detalladu ida ne'ebé agora daudaun halo hosi tékniku sira hosi Ministériu.

"Iha portu Carabela agora daudaun iha polísia investigasaun nian hamutuk ho responsável sira hosi peska nian hodi haree di'ak liután kualidade hosi informasaun sira ne'ebé ami simu. Karik hanesan krimi entaun sei foti medida sira seluk", nia refere.

Governu nia asaun ne'e mosu hafoin polémika daruak, iha tinan ne'e, ho ró sira hosi empreza xineza sira Hong Long Fisheries ho Pingtan Marine Entreprises no ne'ebé iha, dezde fulan-Novembru 2016, lisensa ida tinan ida nia laran hodi halo operasaun iha tasi timoroan nian.

Iha loron 08 Setembru liubá, ró sira ne'e kaer fila fali tubaraun no hetan iha operasaun ida ne'ebé halo hamutuk entre polísia timoroan no hosi organizasaun ambiental Sea Shepherd.

Operasaun ne'e envolve ona ró Ocean Warrior hosi Sea Sheperd ne'ebé ho bero sira ne'ebé iha motor ajuda lori ona efetivu sira hosi Polísia Nasional Timor-LEste (PNTL) nian ne'ebé halo operasaun iha ró sira ne'e nia laran.

Iha fulan-Fevereiru, Lusa fó sai ona katak ró sira ne'e halo hela peska ilegal tubaraun nian, nune'e halo Governu timoroan halo investigasaun interministerial ida ne'ebé, iha fulan-Abril, desidi aplika, ba ró hamutuk 15, multa ida ho dolar 500 (euro 418 resin) ba ró ida-idak.

Estanislau da Silva rekoñese ona katak "lisensa peska nian ba kompañia xineza Hong Long hanesan polémiku, sai objetu hosi komentáriu sira no deskonfia nian", maibé bainhira fó lisensa buat hotu halo tuir lei.

"Iha tempu ne'ebé ami fó lisensa sira ho baze iha informasaun ne'ebé maka fó mai ami no ho baze iha dokumentasaun no deklarasaun hosi kompañia rasik maka ami desidi fó lisensa, maibé iha nfatin kuidadu atu sira tenki kumpri lei sira", nia hatete.

"Agora ami simu informasaun detalladu hosi Indonézia no tanba ne'e maka ha'u haruka suspende atividade sira hosi kompañia hodi bele halo investigasaun klean iha área ne'e. Ha'u komunika ona ba primeiru-ministru iha loron-sesta dadeer kona-ba kazu no ha'u alerta ona ministru Defeza ho Seguransa hodi labele husik ró ida sai hosi portu Carabela nian", nia hatutan.

Ministru hatete katak, iha kazu ba peska tubaraun nian, Governu sei respeita lista hosi espésie protejidu sira, ne'ebé hanesan "barak tebes" no inklui espésie sira ne'ebé halo parte iha Konvensaun kona-ba Komérsiu Internasional hosi Espésie Animal no Ai-horis sira (CITES) no mós sira ne'ebé halo parte iha lista hosi Indonézia ho Austrália.

Governante rekoñese mós katak seidauk hatene loloos saida maka iha ró laran no agora maka foin halo "inspesaun detalladu ida". Lei kalkula medida sira ne'ebé hahú hosi multa to'o prende ró sira ka suspende lisensa, nia hatutan katak Ministériu Públiku halo hela mós investigasaun seluk ida.

"Ami kompromete hodi proteje ita nia rekursu sira iha tasi no bainhira ami hetan violasaun ruma ka karik la kumpri lei ami sei foti medida loloos", nia garanti.

Ministru admiti ona katak kazu ne'e hatudu ona nesesidade hodi hametin meiu sira iha Timor-Leste hodi "hapara peska ilegal" iha tasi timoroan nian ne'ebé, nia garanti, bele hamenus ho prezensa hosi ró xinés sira ne'ebé iha lisensa.

"Ita presiza aumenta patrulla. Ha'u hein katak bele aumenta mekanizmu sira ho ita nia viziñu sira iha Austrália no iha Indonézia kona-ba kestaun ne'e", nia hatete.

"Ita tenki diversifika ita nia ekonomia, maibé ita labele halo bainhira nasaun iha rekursu natural sira ne'ebé hetan estraga. Ne'e hanesan preokupasaun boot ida Governu nian. Ami sei halo esforsu maka'as hodi hetan solusaun sira ne'ebé maka adapta ba aspetu rua ne'e", nia hatutan mós.

SAPO TL ho Lusa