Polisia Labele Backing Jogu Ilegal

DILI - Segundu Komandante PNTL Munisipiu Dili, Superintendente Assistente Polisia, Euclides Belo, husu pesoal polisa labele backing jogu ilegal iha Dili laran. Lalaok nee kontra lei.

Nia husu komunidade, karik iha pesoal polisia ka forsa (F-FDTL) mak backing jogu ilegal hanesan bola guling, bele hatoo keixa ba Komando PNTL Municipiu Dili.

Se hatene sira, bele hatoo keixa. Bola guling nee ilegal, autoridade seguransa labele ba backing fali ka legaliza fali. Laiha atutoridade ida atu legaliza fali buat sira neebe ilegal. Ida nee kontra lai Kuandu ami detekta ka komunidade hatoo keixa katak, pesoal polisia ka forsa mak backing jogu ilegal, maka sei kona sansaun disiplinar, kriminal mos kona tanba legaliza fali atividade neebe mak ilegal,” hateten Euclides ba STL iha Kuartel PNTL Munisipiu Dili,  Segunda (9/10/2017), hodi responde informasaun neebe hateten katak, pesoal polisia balu backing jogu ilegal (bola guling) iha Dili laran.

Konaba atividade futu manu, nia dehan, ida MCIA fo lisensa para sira bele halao atividade ida nee. Ida nee jogu neebe mak iha lisensa. Nee avontade, maibe tenke displina no tuir regras.

Enkuantu SDSB neebe ilegal, nia dehan, polisia nafatin kombate, servisu hamutuk ho servisu informasaun nian hodi buka. Kuandu detekta hetan, polisia sei foti medida rigoroju ba ida nee.

Husi fatin ketak, Diretor Fundasaun Mahein (FM), Nelson Belo hateten, jogu sira iha Dili laran nee, se legal, tenke iha fatin ida ba publiku, para ema hotu bele asesu. Se ilegal entaun membru seguransa tenke halo intervein.

Intervein laos haruka deit polisia mak ba, maibe haruka inspesaun husi ministeriu sira neebe ligadu nee ba para atu halo inspesaun tuir rekezitus ka lae! verifika sira nia dokumentus, ida nee iha ka lae? Se lae kiik boot ita haruka polisia ho militari mak ba e ministeriu sira hateke deit, entaun ita hakarak kiik boot nee ita fo sala ba ita nia povu deit,” dehan Nelson.

Nia dehan konaba pesoal neebe mak diskunfia backing jogu ilegal sira nee, Nelson dehan ida nee fila fali ba instituisaun neebe mak iha.

Iha fulan kotuk, FM produs relatoriu ida katak polisia komete korupsaun efikes, ida nee akontese, tuir ami nia monitorizsaun ida nee akontese, loza sira nee sira ba husu osan ba loza sira nee, dalaruma xineza sira neebe lao korta dalan mos sir aba husu osan, kareta sira dokumentu laiha sira husu osan akontese barak,” hateten Belo.

Problema refere mosu tanba disiplina sama tiha ba rai. Tanba sa mak akontese hanesan nee. Nee mai husi tratamentu ida neebe mak la dignu, salariu la diak.

“Se sira nia salariu la diak, sira nia familia nia moris mos la diak entaun sira buka meius para bele halo sira nia malandru sira nee iha instituisaun estadu nia servisu, neebe sala nee laos sira, maibe sala nee instituisaun tomak katak mai husi aspeitu politiku mos sala”. 

Lucia Ximenes | Suara Timor Lorosae