Extinsaun ba Grupu Arte-Marsiais no Aplikasaun ba Membru F-FDTL no PNTL

Komunikadu Imprensa

Rezolusaun Governu N.o 16/2013 taka total ona atividade arte-marsiais tolu hanesan PSHT, KERA SAKTI no KORK iha Timor-Leste. Maibe atividade husi arte-marsiais hirak ne’e kontinua hala’o no violênsia liga ho arte-marsiais kontinua akontese iha rai laran no balu involve membru FALINTIL-Força de Defesa de Timor-Leste (F-FDTL) no Polícia Nacional Timor-Leste (PNTL). Ikus mai kriminaliza atividade ilísita grupu arte-marsiais ho Lei N.o 5/2017 de 19 de Abril Regime Jurídico Relativo à Prática de Arte Marciais, Rituais, Armas Brancas, Rama Ambon e Quinta Alteração ao Código Penal.

Iha loron 11 Dezembru 2017 Institusaun F-FDTL halo separasaun servisu ba membru F-FDTL ida husi Componente Apoio Serviço (CAS) tamba involve iha arte-marsiais PSHT. Separasaun servisu signifika katak lakon ona ninia kualidade nu’udar militar ka demite husi institusaun tamba la kumpri regulamentu no lei sira.

Portantu Rezolusaun Governu N.o 16/2013 Extinção de Grupos de Artes Marciais determina extinsaun ba grupu arte-marsiais hanesan PSHT, KERA SAKTI no KORK, ho bandu total kontinuasaun ba kualker atividade arte-marsiais. Ho bandu ida ne’e determina polítika “tolerânsia zero” ba membru sira PNTL no F-FDTL involve iha atividade arte-marsiais. Nune’e bainhira involve sei aplika sansaun sira disiplinar, inklui demisaun husi institusaun tuir termus estatutu disiplinar nian.

Nune’e mos Lei N.o 5/2017 de 19 de Abril Regime Jurídico Relativo à Prática de Arte Marciais, Rituais, Armas Brancas, Rama Ambon e Quinta Alteração ao Código Penal. Portantu Lei ne’e mai hodi kriminaliza prátika no exersisiu ilísita arte-marsiais no prátika rituais iha kontestu arte-marsiais. Bainhira prátika husi elementu sira F-FDTL, forsa seguransa, majistradu sira, ofisiais justisa, funsionariu estadu no ejente administrasaun públika ne’ebé responsável ba prevensaun no represaun ba atividade ilísita sira ne’ebé ko’alia iha Lei ne’e ho pena prizaun tinan 6 to’o 10.

Maibe la iha informasaun ne’ebé fo sai ba públiku kona-bá prosesu kontinuasaun hasoru eis-membru F-FDTL ne’e. Tamba Lei N.o 5/2017 de 19 de Abril Regime Jurídico Relativo à Prática de Arte Marciais, Rituais, Armas Brancas, Rama Ambon e Quinta Alteração ao Código Penal kriminaliza mos prátika no exersisiu ilísita arte-marsiais no prátika rituais iha kontestu arte-marsiais.

Rekomendasaun

Rekomenda ba institusaun F-FDTL no PNTL kontinua fortifika disiplina membru sira nian hodi nune’e komprimenta lolos ba misaun institusaun nian, lei no Konstitusaun.

Rekomenda ba membru sira institusaun F-FDTL no PNTL komprimenta no asegura kona-bá implementasaun ba rezolusaun no lei ne’ebé proibidu ka bandu ba prátika no exersisiu ilísita arte-marsias no prátika rituais iha kontestu arte-marsiais.

Atu hetan informasaun kle’an liu kona-bá asuntu ne’e bele kontaktu:

Nélson Belo

Diretor Ezekutivu

Email: direktor.mahein@gmail.com

Telemovel: (+670) 78316075 ka 77561184

Website: www.fundasaunmahein.org