Problemátika Dr. Mari Alkatiri nu’udar Primeiru-Ministru

Hosi Hercus Pereira dos Santos * | opinião

Formasaun governu agora sei hasoru problema oioin. Hun hosi problema sira-ne’e ida maka hanesan ita hotu hatene votos iha Parlamento Nacional ladún sufisiente lori fó estabilidade governativa. Iha parte ida-ne’e ita hotu hakerek halo análize oioin lori hato’o ideia no solusaun posivel ruma.

Ohin ha’u hakarak hakerek artigu ida-ne’e ho badak atu ba diretamente ba asuntu lori fó hanoin de'it ba lideransa partidu polítika sira hanesan Fretilin, CNRT, PLP no Khunto atu hanoin di’ak-di’ak took vantajen no dezvantajen saída maka Timor-Leste sei hasoru bainhira Sétimu Governu Konstitusionál monu.

Ba ha’u nu’udar akadémiku simples oan ida ha’u sujere atu lideransa partidu hotu-hotu ne'ebé iha asentu parlamentár haraik an uitoan lori halakon tiha arrogánsia atu oinsá simu malu lori apoiu Sétimu Governu Konstitusionál ne’e la’o ba oin ho hanoin ruma hanesan tuir mai ne’e.

Primeiru, Dr. Mari Alkatiri nu’udar fundadór ba estadu RDTL iha moos direitu hanesan ho lideransa sira seluk lori ukun estadu ida-ne’ebé nia rasik moos kontribui. Se lideransa sira seluk bele ukun, troka ida lori hasae seluk ba Primeiru-Ministru, kontinua la’o ba oin tanbasá maka Dr. Mari Alkatiri la bele ukun to’o rohan? Se lider rezisténsia sira-ne’e iha konxiénsia di’ak tanbasá sira moos la bele apoiu Sétimu Governu Konstitusionál ne’e to’o rohan? Se sira bele apoiu malu atu balu sai Primeiru-Ministru ou apoiu malu atu balu sai Prezidente Repúblika tanbasá sira la bele apoiu moos Dr. Marie Alkatiri ninia ukun nu'udar Primeiru-Ministru to'o mandatu remata? Ha'u la koñese pesoálmente Dr. Mari Alkatiri no Dr. Mari Alkatiri moos nunka koñese ha'u. Maibé nu'udar sidadaun ha'u moos observa ba lala'ok ukun na'in sira nian. Tanba ne’e maka ha’u haree hanesan ladún iha justisa ba Dr. Mari Alkatiri. Ha'u tenke dehan katak ha'u la apoiu lider rezisténsia ida lori kontra lider rezisténsia seluk maibé ha'u-nia observasaun maka ha'u haree hanesan iha diskriminasaun ba Dr. Mari Alkatiri hosi lider rezisténsia sira seluk balu. Nu’udar ida hosi fundadór estadu RDTL,  Dr. Mari Alkatiri moos iha hanoin no mehi ruma, no liu-liu Dr. Mari Alkatiri moos iha kapasidade ne'ebé la iha ema ida maka bele kestiona lori ukun nu’udar Primeiru-Ministru atu kontribui ba estadu ne'ebé nia rasik moos harii. Tanbasá maka la fó moos oportunidade lai ba Dr. Mari Alkatiri lori ukun to’o rohan. Lori halo tuir hanoin ida katak husik jerasaun tuan prepara transferénsia ukun ba jerasaun foun. Agora tempu ba jerasaun tuan sira kaer ukun lai ba. Jerasaun tuan ida maka Dr. Mari Alkatiri husik kaer ukun nu'udar Primeiru-Ministru to'o mandatu tinan lima tiha lai ba. Ha'u nu'udar sidadaun konkorda tebes atu ukun iha Timor-Leste husik lai ba jerasaun tuan sira maka kaer iha tinan sanulu ba oin nia laran. Tanba ne'e ha'u rasik moos sei konkorda tebes bainhira Sua Exelénsia Prezidente Repúblika Dr. Francisco Guterres – Lu Olo ninia mandatu remata, Jenerál Lere Anan Timur maka sai hikas nu'udar Prezidente Repúblika. Ho hanoin simples. Sira maka komanda luta lori harii estadu Timor-Leste husik ba sira tuur iha fatin importante hanesan Primeiru-Ministru no Prezidente Repúblika atu kontinua halo sira-nia Istória di'ak iha Timor-Leste nia moris tomak. Solusaun ba estabilidade governativa Sétimu Governu Konstitusionál, tuir ha'u-nia haree, iha hela lider rezisténsia sira-ne'ebé maka sai nu'udar lideransa partidu sira-nia liman. Sira kuandu dehan A hotu-hotu dehan A. Se maka brani atu kontra sira-nia hakarak? Nein ema ida!

Segundu, Dr. Mari Alkatiri iha legalidade konstitusionál lori ukun. Katak hili Dr. Mari Alkatiri nu’udar Primeiru-Ministru tuir Konstituisaun Repúblika Demokrátika Timor-Leste. Falta de’it maka votos ne’ebé ladún sufisiente lori iha estabilidade governativa maibé falta ida-ne’e bele halakon bainhira iha unidade entre lideransa partidu polítiku sira ne'ebé iha asentu iha Parlamentu Nasionál lori fó konsiderasaun ba malu, apoiu malu, kolabora ba malu hanesan uluk sira halo iha tempu funu atu nune’e bele kontribui ba povu nia moris di’ak. Bainhira Dr. Mari Alkatiri hala'o ukun la loos no bainhira iha kazu grave ruma maka opozisaun iha Parlamentu Nasionál iha direitu tomak lori hamonu Sétimu Governu Konstitusionál.

Terseiru, Dr. Mari Alkatiri hatudu ninia disponibilidade lori buka halo programa Sétimu Governu Konstitusionál ho di’ak lori serbí di’ak povu nia moris. Postura polítika Dr. Mari Alkatiri nian iha mudansa ne'ebé di'ak tebes. Tanba ne’e maka mundu internasionál, liuhosi Dr. Ramos Horta, apresia lideransa Dr. Mari Alkatiri nian. Ita haree katak Dr. Mari Alkatiri  hatudu an nu’udar lider demokrátiku no grande estadista de Timor-Leste.

Kuatru, atu la gasta tempu  no la gasta osan lori halo eleisaun antesipada. Tanbasá? Ha’u bele dehan katak se partidu opozisaun sira, entre sira ida, iha serteza katak bele manan nu’udar partido mais votado entaun ita hakat ba eleisaun antesipada tanba ho nune’e bele muda senáriu polítika ba formasaun governu. Maibé se lae, di'ak liu lalika gasta tempu no gasta osan atu kontinua mosu hikas situasaun polítika hanesan buat ne'ebé maka akontese daudaun. Imajina iha eleisaun antesipada se Fretilin maka kontinua nu’udar partidu mais votado ne’e katak Presidente da República sei kontinua fó oportunidade ba Dr. Mari Alkatiri nu’udar Primeiru-Ministru no ikus mai ita kontinua fila ba senáriu ne’ebé Sétimu Governu Konstitusionál agora hasoru daudaun. Tanba de’it arrogánsia lideransa partidu sira iha asentu parlamentár, Estadu Timor-Leste gasta de’it tempu no osan? Ha’u nu’udar sidadaun fó hanoin de’it. Lideransa sira-ne’e maka harii estadu ida-ne’e ita atu ko’alia tan saída? Maibé pelumenus ita fó netik hanoin ruma. Lideransa partidu sira-ne’e atu simu la simu sira iha direitu tomak atu deside. Maibé se ita halo eleisaun antesipada agora daudaun lori hamosu presedente di’ak ba oin katak kualkér mudansa ba Primeiru-Ministru ou bainhira programa governu nian hetan rejeisaun dala rua hosi Parlamentu Nasionál ou se iha mosaun sensura ba programa governu nian no mosaun sensura ne’e pasa lori hamonu governu entaun ita gasta tempu no gasta osan iha vantajen di’ak lori hametin Estado de Direito Democrático. Se ita halo eleisaun antesipada lori fila hikas ba senáriu ne’ebé agora ita hasoru hela daudaun ne’e tanbasá maka lideransa partidu sira iha asentu parlamentár la buka solusaun ne’ebé maka di’ak liu lori bele hametin Sétimu Governu Konstitusionál ne’e ba oin. Ita husu sé maka ukun iha Timor-Leste? Ita haree ba-mai lider sira ne’e duni maka ukun rai Timor-Leste. Sira ukun iha fatin ou pozisaun maka la hanesan maibé sira kontinua ukun nafatin. Mezmu balu la kaer karik ukun ruma iha órgaun estadu nian maibé sira kontinua ukun. Bainhira sira ko’alia ema hotu respeitu. Sira kontinua ukun rai doben Estadu Timor-Leste ne’ebé maka sira lidera lori harii.

Ita espera katak lideransa partidu sira-ne’ebé hetan asentu parlamentár bele karik simu malu lori kontribui harii Estado de Direito Democrático ne’ebé bazeia loloos de’it ba supremasia lei nia ukun.  Obrigadu.

*Antigo aluno Direitos Humanos da Escola de Direito da Universidade do Minho