DILI, (TATOLI) - Adjuntu
Sekretáriu Jerál Partidu FRETILIN, José Reis konsidera ema hirak ne’ebé oras
ne’e daudaun lansa informasaun katak frente tolu Libertasaun Patria (Frente
Armada, Diplomátiku no Klandestina) iha problema, ida ne’e atitude
irresponsabilidade.
Nia dehan situasaun ne’ebé ohin
loron iha la’ós problema entre Frente tolu maibé problema oinsá maka povu ne’e
bele moris di’ak no dezenvolvimentu ba oin ne’e di’ak.
Nia fiar povu sei la monu ba
informasaun falsu hirak ne’e basa povu ohin loron matenek ona. Povu hakarak iha
mudansa ba sira nia moris tanba ne’e ema hirak ne’ebé soran frente tolu ne’e
kosideradu la iha responsabilidade, sira nia atitude tenta atu dezvaloriza
frente hirak ne’e nia kontribuisaun ba luta libertasaun patria.
“Povu ne’e matenek ona. Sira
hakarak iha mudansa ba sira nia moris,” Reis informa asuntu ne’e ba jornalista
sira iha Palásiu Prezidente Nicolau Lobato, Bairru Pité, Dili, kuarta ne’e,
bainhira hatán preokupasaun kona-ba grupu balun tenta atu soran frente
rezisténsia.
Ho maturidade ne’ebé povu iha
José Reis, konfia katak povu sei la monu iha provokasaun falsu, justifikasaun simplest
mak povu hatudu ona katak sira iha maturidade ba momentu inserteza polítika
durante fulan neen nia laran.
“Inserteza polítika iha fulan
neen nia laran povu hatudu nia maduru, prinsipálmente joven sira no
jornalista sira mós kontribui ba estabilidade ida ne’e. Ne’e duni, apela ba
joven sira nó mós mídia para bele kontribui estabilidade no pás molok no hafoin
eleisaun,” nia haklaken.
Enkuantu hatán kona-bá kalendáriu
eleisaun, ne’ebé aprezenta hosi Komisaun Nasionál Eleisaun (CNE-sigla Portugés)
no Sekretariadu Téknika Administrasaun Eleitorál (STAE), José Reis dehan,
partidu FRETILIN laiha objesaun ba proposta kalendáriu eleisaun antesipada,
tanba konsidera CNE ho STAE nia argumentu razoavel.
“Prosedimentu tékniku ne’ebé
prepara hosi CNE no STAE, ami haree katak loos. Ita hotu sei enfrenta Páskua
iha fin Marsu to’o Abríl. Ho argumentu sira ne’e hotu ami laiha objesaun ba
loron eleisaun,” José Reis dehan.
Jornalista: Xisto Freitas | Editór:
Manuel Pinto
Imajen: Adjuntu Sekretáriu Jerál
Partidu FRETILIN, José Reis, dadalia ho jornalista sira iha Palásiu Prezidente
Nicolau Lobato, ohin. Imajen Mídia Palásiu PR.
Sem comentários:
Enviar um comentário