Deskunfia, envolve autoridade seguransa balun iha kazu kontentor 9

Fundasaun Mehain (FM) deskunfia autoridade seguransa balun envolve iha kazu konentor 9 ne’ebe hatama material prima dgora iha Porto Dili, foin lalais ne’e.

Iha loron 23 fulan Janeiru, tinan ne’e, Unidade Polisia Maritima (UPM) prende material prima ba produs droga iha kontentor 9 nia laran ne’ebe hatamna mai liu husi Porto Dili.

“Iha kazu sira hanesan droga alende involve sidadaun sira sivil tantu estrangeiru, iha kazu balun deskonfia involve mos autoridade pesoal seguransa balun,”   hateten Adjuntu Direktur FM, João Almeida liu husi konfrensia ba imprensa ne’ebe hala’o iha edifisiu FM, Fomento, Dili, Kuarta (28/03/2018).

FM nia preferensia katak, mundu ohin loron, krime organizadu transnasional, hanesan asuntu preokupante husi nasaun hotu-hotu ne’ebé afeta direta ba populasaun sira nia vida. Timor-Leste hanesan nasaun ida ne’ebé iha ameasa no risku ba krime organizadu transnasional.

FM konklui katak Timor-Leste hanesan nasaun transit ba droga no nia objetivu ka distinu ba nasaun viziñu sira liu-liu Indonézia. Nune’e kna’al ka odamatan sira ne’ebé kritiku maka fronteira terestre, aero portu no portu.

Grupu krime organizadu transnasional sira haree katak kanal sira ne’e fasil liu tama-sai, tamba kontrolu husi autoridade seguransa sira sei fraku, menus ba ekipamentu no fasilidade sira hodi kontrola no detekta.

Husi relatoriu advokasia FM Fronteira terestre iha 2014 Senhor ida ne’ebé involve iha sindikatu Internasional droga nian lori tama droga ho tipu Sabu-sabu Kristal 1,595 Kg ho valor minimu $ 478,500.00, ne’ebé tau subar iha mangeira Chuveiro nian no Polisia kaer iha Dili depois maka deskobre, ne’ebé maka iha 2015 Tribunal Dili kondena tinan 10 iha Prizaun. Razaun sindikatu ne’e hili tama husi fronteira tanba sistema kontrola iha ne’eba sei fraku.

Iha Aero Portu Internasional Prezidente Nicolau Lobato sidadaun Indonézia na’in rua ne’ebé Polisia kaer iha Aeroportu Prezidente Nicolau Lobato lori Sabu- sabu Kristal 1,192 Kg ho valor minimu $ 356,100.00 ne’ebé maka ho distinu Denpasar – Indonezia.

Polísia kaer arguida na’in rua (2) ne’e hamutuk ho objetu krime no iha tinan 2015 Tribunal Dili kondena ho pena tinan 15 no tinan 13 fulan 6. Haree mos katak aviaun sira ne’ebé tranzit iha Singapura no pasajeiru sira ho distinu atu mai Timor-Leste ka paísseluk iha Azia normalmente la hetan kontrolu maka’as iha Singapura.

Trafikante balun maka aproveira situasaun ne’e hodi mai Timor-Leste tamba sira mos hatene katak Timor-Leste nia sistema kontrolu mos sei kontinua nafatin frazil.

Husi Portu Dili ne’ebé sei fresku hela iha ita hotu nia hanoin ne’ebé Polísia prende kontentor sia iha loron 23 Janeiru 2018. Iha ne’ebé sasan ne’ebé kontein iha kontentor sia nia laran materia prima hodi produs PCC (Parcetamol, Caffein and Corrosprodol) hamutuk tonelada 162. Materia prima hirak ne’e nia distinu ba Indonézia. Suspeitu ba kazu ne’e sidadaun Timor-oan na’in ida no Indonézia na’in rua no submete ona ba primeiru interogatoriu iha Tribunal Distrital Dili no aplika Termu Identidade Rezidensia (TIR)

Ironiku liu tan no halo hotu-hotu preokupa suspeitu ida hanesan sidadaun Indonézia halai sai ona husi teritoriu nasional. Mesmu kazu ne’e sei iha hela prosesu investigasaun nia laran.

Governu persiza tau atensaun maka’as hodi reforsa sistema kontrolu hanesan ekipamentus, rekursu umanu no seluk-seluk hodi evita kriminalidade organizada no transnasional sira ne’e. Prinsipalmente oinsa maka bele tau-matan ba servisu integradu sira iha fronteira terestre, Portu Dili no Aero Portu Internasional Prezidente Nicolau Lobato. eus

GMN TV | Grupo Média Nacional