Prezidente timoroan, Francisco
Guterres Lu-Olo, apela iha loron-tersa ne'e ba partisipasaun máxima hosi
eleitor sira iha eleisaun antesipadu sira loron 12 Maiu nian, afirma katak
líder polítiku sira tenki aproveita kampaña ne'ebé hahú ohin hodi debate kona-ba
programa sira no la'ós ba ofensa sira.
"Maun alin no inan-feton
sira: imi nia votu hanesan importante. Imi nia votu hanesan votu ida konfiansa
nian no hosi poder iha partidu, ka koligasaun hosi partidu sira, ne'ebé sei
harii governu iha tinan lima oinmai", Francisco Guterres Lu-Olo refere iha
mensajen ida ne'ebé fó sai hosi gabinete Prezidénsia nian iha loron-tersa ne'e.
"Partisipa iha eleisaun sira
iha 12 Maiu 2018. Mai ita vota hodi hili programa ne'ebé lori liután moris
di'ak ba ema tomak. Mai ita hili partidu ka koligasaun ho polítika dezenvolvimentu
di'ak liu. Mai ita vota ba ita nia futuru! Hanesan tempu hodi ita haree ba
oin", nia hatutan.
Diriji direta ba líder polítiku
sira, Lu-Olo afirma ona katak kampaña eleitoral "bele hamosu ezaltasaun
balun, halo ema balun haluha nia sentidu dever no kompromisu ba respeita
malu".
Tanba ne'e, nia apela ona ba
forsa polítika sira "hodi bazeia nia krítika sira iha polítika ho programa
sira - no la'ós ofende dignidade" no iha "líder hosi partidu sira
nian ka koligasaun sira nia liman laran dever, liuliu hasoru jerasaun foun
sira, hatudu dalan respeitu ba adversáriu polítiku sira, hanesan ema sira
ne'ebé investe iha direitu loloos".
Partidu haat ho koligasaun haat
hanesan kandidatu sira ba eleisaun lejislativa antesipadu sira ne'ebé konvoka
hafoin fulan barak tensaun polítika iha Timor-Leste no ne'ebé sei hili deputadu
na'in 65 ba lejislatura dalima.
Ne'e sei hanesan boletin votu ho
númeru kandidatura ki'ik ba nafatin no mós ho númeru aas hosi koligasaun
pré-eleitoral sira iha Timor-Leste nia istória, ne'ebé restaura nia
independénsia iha tinan 2002.
Kampaña, ne'ebé hahú ohin ho
asaun oioin ho dimensaun oioin iha kuaze nasaun tomak, hotu iha loron 09 Maiu,
antes loron rua reflesaun nian ne'ebé sei hanesan mós oportunidade ida ba
eleitor barak hodi halo viajen ba zona sira ne'ebé hanesan sira nia fatin
resenseamentu.
Diriji mós ba ema timoroan sira
iha Timor-Leste ho iha estranjeiru - bele vota eleitor sira ne'ebé halo
resenseamentu iha Austrália, Koreia-Súl, Reinu Unidu ho Portugal - Lu-Olo fó
hanoin katak konvoka ona eleisaun antesipadu hodi hanoin iha nasaun nia futuru.
"Nu'udar Prezidente
Repúblika, ha'u desidi konvoka eleisaun antesipadu, apela ba povu Timor-Leste
nian, ne'ebé kaer kbiit polítiku, hodi reflete dalan ida tan kona-ba forsa
polítika ne'ebé maka serve di'ak nasaun iha faze daruak hosi ita nia luta ba
libertasaun: hodi hamenus pobreza iha ita nia rai doben Timor-Leste",
refere iha mensajen.
"Ha'u fiar katak eleisaun
antesipadu sei kontribui hodi aprofunda ita nia demokrasia", nia subliña.
Konfiante katak "povu
Timor-Leste sei hatudu, dala ida tan, nia maturidade polítika", xefe
Estadu hatete katak aleinde konsege "admirasaun hosi komunidade
internasional", kontinua hatudu "dalan demokrasia loloos nian iha
rejiaun".
Maski iha tensaun polítika iha fulan
hirak ikus ne'e, situasaun iha Timor-Leste hakmatek nafatin lahó insidente
polítika ka asosiadu ba situasaun governativu ho parlamentar.
SAPO TL ho Lusa
Sem comentários:
Enviar um comentário