Tempu Badak Sei Hadia Edifisiu TDD

DILI - Kondisaun Tribunal Distrital Dili (TDD), la favorese ona atu Juis sira halo servisu ho diak, no julgamentu ho lalais espasu nee laiha ona kondisaun atu sira halo servisu ho diak.

Hau hanoin planu ami nian ba oin nee maka tenke hadia lalais kondisaun Tribunal Distrital Dili, tanba ita haree ba kondisaun nee la merese ona atu juis sira halo servisu hodi dudu prosesu nee ho lalais, tanba nee ita tau ona iha planu katak sei hadia iha tempu badak,” informa Prezidente Tribunal Rekursu Deolindo dos Santos ba Jornalista, Segunda (09/04/2018) bain hira remata enkontru ho Prezidente Republika Francisco Guterres Lu Olo, iha Palasiu Prezidensial Bairo Pite Dili.

Nia mos afirma liu tan katak, atu harii edisifiu Tribuanal Supremiu nee, sei iha prosesu nia laran, tanba tenke haree didiak fatin nee iha neebe, no edifisiu nee sei gastan osan hira, no ema nain hira maka bele servisu iha laran,  liu husi buat sira nee karik, harii duni tribunal supremiu nee tenke serteza.

Nia mos afirma liu tan katak, haree ba kondisaun Tribunal Distrital nian nee ladun diak ona, no fatin sira nee la saudavel ba Juis sira atu halo servisu tanba nee, maka hanesan Prezidente Tribunal Rekursu mai hatoo preokupasaun sira nee ba Prezidente da Republika atu fo nia hanoin, fiar katak iha tempu badak sei hadia.

Tuir Observasaun haree katak, kondisaun Tribunal Distrital Dili presiza governu toma atensaun tanba, kondisaun limitadu no sala julgamentu iha neen deit. 

Madalena Horta | Suara Timor Lorosae