quarta-feira, 11 de abril de 2018

Lere Preokupa ho Linguajen Diskriminativu iha Kampaña Eleitorál

PARTILHAR

DILI, (TATOLI) – Xefe Estadu Maior FALINTIL-Forsa Defeza Timor-Leste (F-FDTL), Majór Jenerál Lere Anan Timur, preokupa ho linguajen diskriminativu ne’ebé lider partidu polítiku balun lansa iha abertura kampaña eleisaun antesipada, tersa horsehik.

“Hanesan elementu seguransa, ami mós preokupa kona-ba situasaun ne’ebé agora ita atravesa daudaun. Preokupa uitoan kona-ba lider partidu balun nia linguajen ne’ebé diskriminativu. Pur-ezemplu, lider balun ne’ebé uluk inklui iha Frente Armada ko’alia de’it kona-ba sira nia terus, susar, mate no situasaun pasadu”, Lere hato’o ba jornalista sira iha Palásiu Prezidente Nicolau Lobato, Bairru Pité, kuarta ne’e, hafoin soru-mutu ho Xefe Estadu, Francisco Guterres Lú Olo.

Kona-ba pasadu, nia dehan duké konta, nia prefere hakerek rasik ninia istória pasadu iha livru para aban bainrua jerasaun foun sira hatene.

“Ha’u nu’udar gerileiru ida, ha’u dehan pasadu ne’e ha’u hakerek ba ha’u nia istória para aban bainrua jerasaun foun ne’e hatene. Ha’u laiha partidu. Maibé aban bainrua keta ha’u tama partidu ida karik, ha’u moe ko’alia kona-ba pasadu, maibé ha’u hakerek iha ha’u nia istória”, realsa.

Nia hatutan ema ne’ebé halo funu durante tinan 24 nia laran, biar terus uitoan ka barak ne’e hotu-hotu terus.

“Bainhira ita dasin ita nia terus no sakrifísiu ne’e, dalaruma liu malu, katak balun kilógrama 10 no balun kilógrama 100. Maibé hosi kilógrama boot no ki’ik tau hamutuk maka ita atinje ukun án”, eis Komandante FALINTIL Rejiaun 1 ne’e haklaken.

Nia mós hateten esforsu, pensamentu úniku no relasaun ne’ebé di’ak entre lider Frente Externa no Armada iha pasadu maka ohin loron Timor bele hetan ukun rasik aan.

Lere husu ba veteranu sira atu aproveita kampaña ne’e ko’alia kona-ba programa, oinsá rezolve povu nia terus, rezolve veteranu sira nia problema no problema sosiál sira seluk.

“Ita agora ko’alia maka mehi hosi ita nia maluk sira ne’ebé mate ona ne’e. Sira nia mehi ne’e hakarak Timor independente, moris hakmatek no haksolok iha dezenvolvimentu nia laran”, afirma.

Hafoin kampaña, nia sujere ba lider nasionál sira atu buka malu túr hamutuk halo diálogu para kontradisaun iha pasadu ne’e labele sai kultura ba jerasaun foun, tenke koerente ba malu, transparente ba malu purke jerasaun foun sira presiza lider istóriku unidu.

Relasiona soru-mutu ho Prezidente Repúblika, Lere hateten, hato’o ba Prezidente Repúblika katak situasaun iha abertura kampaña la’o hakmatek no komandu F-FDTL koloka ona elementu forsa armada hamutuk ho membru PNTL hodi halo seguransa espesiál ba lider istóriku hanesan Marí Alkatiri, Ramos Horta, Xanana Gusmão no Taur Matan Ruak durante kampaña la’o. 

Jornalista: Xisto Freitas | Editora: Rita Almeida

Imajen: Xefe Estadu Maior FALINTIL-Forsa Defeza Timor-Leste (F-FDTL), Majór Jenerál Lere Anan Timur.
PARTILHAR

Author: verified_user

Publicação luso-timorense sem fins lucrativos

0 comentários: