Sekretáriu-jeral Fretilin nian,
forsa daruak iha Parlamentu timoroan, garanti iha loron-tersa ne'e katak
partidu sei sai "opozisaun sériu ida", verifika ho detalle tomak
asaun tomak hosi Governu, ne'ebé bele simu pose iha semana ne'e.
"Fretilin sei sai opozisaun
sériu ida. Sei haree buat hotu ho di'ak tebes. Sei atua ho sentidu
responsabilidade nian", Mari Alkatiri hatete iha deklarasaun sira ba
jornalista sira iha Palásiu Prezidensial iha Díli.
Alkatiri ko'alia ba jornalista
sira hafoin delegasaun ida hosi Frente Revolucionária do Timor-Leste
Independente (Fretilin) hasoru malu ho Prezidente Repúblika, Francisco Guterres
Lu-Olo, ne'ebé rona fali partidu sira ne'ebé iha fatin iha parlamentu hodi
haree ba formasaun Governu foun.
Hatán kona-ba eskolla Taur Matan
ruak hodi xefia Governu foun, Alkatiri hatete katak opozisaun sei serbisu ho sé
maka Aliansa Mudansa Progresu (AMP), ne'ebé manán eleisaun, hili.
"Sé maka manán eleisaun
desidi sé maka sai nu'udar primeiru-ministru. Ho natural, hanesan opozisaun ami
tenki iha relasaun ho ema ne'ebé maka Prezidente Repúblika hili no fó
pose", nia hatete.
Alkatiri lakohi mós halo
previzaun sira kona-ba futuru hosi koligasaun Governu nian no insisti katak
opozisaun hanesan forte.
"Ha'u la'ós hanesan profeta
no ha'u lakohi halo profesia. Ha'u dezeja ba sira buat di'ak tomak. Opozisaun
hanesan forte, tenki halo de'it opozisaun. Sé maka governa tenki hatene saida maka
tenki halo ba governasaun iha rezultadu", nia afirma.
Responsável komenta mós, ba dala
uluk, deklarasaun sira ba Lusa hosi eis-Prezidente José Ramos-Horta, ne'ebé iha
semana liubá defende ona katak Mari Alkatiri tenki hahú prosesu ida hosi
"renovasaun lideransa" partidu nian ne'ebé karik tenki akontese
"lalais tebes" ba Fretilin ho nasaun nia di'ak.
"Idade la perdua no tinan
hirak ne'e gasta ona ami iha nível pesoal no polítika", Ramos-Horta hatete
iha entrevista ba Lusa.
"Hanesan tempu, liuliu
hafoin Prezidente Lu-Olo eleitu ona, hanesan urjente atu Mari Alkatiri lidera
prosesu tranzisaun ida ne'ebé tenki akontese lalais. To'o ona tempu hodi hanoin
iha renovasaun ba lideransa", nia subliña.
Insisti hodi halo komentáriu ba
deklarasaun sira ne'e, Alkatiri afirma ona katak tranzisaun iha partidu hala'o
daudaun.
"Tranzisaun iha Fretilin
hala'o hela durante tinan hirak ne'e. Sé maka la halo parte iha instituisaun no
la koñese moris institusional nian halo sujestaun sira ne'ebé dalabarak la tuir
kontestu. Tranzisaun halo hela no sei halo nafatin. Ami la presiza sujestaun
hosi liur", nia afirma.
SAPO TL ho Lusa
Sem comentários:
Enviar um comentário