DILI, (TATOLI) – Fundu
Mina-Rai iha trimestre ne’ebé termina iha 30 juñu 2018 hamutuk billaun U$16.93
kompara ho trimestre dahuluk (janeiru-marsu) mak billaun U$16.85.
Vise Governadór Banku Sentrál
Timor-Leste (BSTL), Venancio Alves Maria, informa osan ne’ebé tama durante iha
trimestre ida ne’e husi realeza (royalty) no taxa sira mak millaun U$113.26.
Montante ida ne’e kompostu husi
kontribuisaun kontribuinte sira ba fundu hamutuk millaun U$40.59 no pagamentu
realeza husi Autoridade Nasionál Petróleu millaun U$72.67
“Osan ne’ebé maka sai husi fundu
durante trimestre ida ne’e millaun 74.50 kompostu husi millaun 70 ita transfere
ba orsamentu Estadu no millaun 4.50 ba kustu jestaun nian”, Venancio afirma
ohin iha lansamentu relatóriu Fundu Petrolíferu iha edifísiu BSTL.
Venancio hatutan reseita líkidu
durante trimestre (abríl-juñu) ne’e hamutuk millaun U$43.26.
“Ida ne’e hatudu katak retornu
karteira Fundu Petróleu nian iha trimestre ida ne’e 0.26% kompara ho retornu benchmark (referénsia)
mak 0.28%”.
Vise Governadór ne’e esplika
totál Fundu Petróleu nia retornu porsentu 0.26 kompara ho referénsia porsentu
0.28 ne’e mai husi rendimentu iha títulu mak porsentu -0.65 kompara ho nia referénsia
porsentu -0.74.
“Kontribuisaun seluk fali mak mai
husi asaun internasionál mak porsentu 1.77 kompara ho referénsia porsentu 1.73,
ida ne’e mak movimentu retornu en termu persentajen iha trimestre ne’e. Kuandu
ita haree fali ba tinan ida katak hahú maiu tinan kotuk mai to’o juñu tinan ida
ne’e nia retornu 4.28% kontribui husi rendimentu títulu ba tinan ida ne’e nia
-0.47% kompara ho nia benchmark -0.59%”, haktuir.
Nia hatutan tan kontribuisaun
tinan ne’e mai husi asaun internasionál sira porsentu 11.22 retornu karteira
kompara ho nia benchmark ba asaun (saham) porsentu 11.09.
Nia akresenta bainhira haree ba
retornu dezde inísiu fundu ne’e hahú iha 2005 mai to’o agora totál fundu nia
retornu porsentu 4.17 kontribui husi retornu títulu porsentu 2.46 no asaun
internasionál porsentu 10.08.
Jornalista: Maria Auxiliadora | Editora:
Rita Almeida
Imajen: Vise Governadór Banku
Sentrál Timor-Leste (BSTL), Venancio Alves Maria. Foto/BSTL.
Sem comentários:
Enviar um comentário