Governu Garante Eletrisidade Sei La Mate

DILI, (TATOLI) – Ministru Reforma Lejislativa no Asuntu Parlamentár, Fidelis Leite Magalhães, alerta governu garante eletrisidade sei la mate iha Timor-Leste laran tomak.

“Governu halo esforsu hotu hodi ahi labele mate ka garante duni ahi sei la mate, mezmu informasaun espalla ona katak ahi sei mate tanba kestaun kombustivel,” Fidelis Magalhães hatán ba kestaun deputadu sira nian relasiona ho asuntu ahi, iha Parlamentu Nasionál, Ohin.

Nia dehan, governu halo esforsu atu ahi (eletrisidade) la mate. Ba  informasaun ne’ebé espalla katak tanba problema ho kombustivel ahi sei mate, ida ne’e governu hasoru malu ho kampaña (Timor Oan-ETO).  ne’ebé fornese mina ona, no kompañia garante katak sei nafatin supply mina no promete katak mina (kombustivel) sei la hotu.

“Sira husu mai governu atu fasilita hodi halo dezkarregamentu lais atu nune’e labele difikulta asesu ba fornesimentu mina ba jeradór, nune’e parte governu dehan ahi sei la mate,” Fidelis esplika tan.

Iha parte seluk, Deputadu hosi Partidu Demokrátiku (PD), Adriano do Nascimento kestiona eletrisidade sei mate tanba nia haree iha publikasaun mídia eletrónika no imprime.

Jornalista: Zezito Silva | Editór: Manuel Pinto

Imajen: Ministru Reforma Lejislativa no Asuntu Parlamentár, Fídelis Leite Magalhães. Foto António Goncalves