Luta Hamutuk Preokupa Transferénsia Fundu Minarai

DILI, (TATOLI) – Institutu ba Peskiza, Advokasia no Kampaña, Luta Hamutuk Preokupa transferénsia osan husi fundu minarai ba orsamentu Estadu iha sétimu no oitavu governu konstitusionál.

Basá, tuir análize Luta Hamutuk, transferénsia ne’ebé governu da-hitu halo ho montante dolár milaun 70 no oitavu governu nia proposta dolár milaun 140, loloos labele uza de’it materiál lei orsamentál 2017 artigu 9o, 7o nomós artigu 31o lei jestaun finanseiru kona-ba orsamentu duodésimu.

“Luta Hamutuk konsidera katak odamatan hodi halo transferénsia osan fundu minarai ba konta governu maka lei fundu minarai artigu 7o alinea 1,2,3 kona-ba transaferénsia, artigu 8o kona-ba rekizitu ba transferénsia, artigu 9o kona-ba transferénsia exededu estimasaun rendimentu sustentável, artigu 10o kona-ba transferénsia ba reembolsu”, dehan Diretór Ezekutivu Luta Hamutuk, José Alves da Costa, ba TATOLI iha edifísiu Luta Hamutuk, Farol, ohin.

Luta Hamutuk reforsa atu klarifika liutan katak la iha tan odamatan seluk hodi asesu transferénsia fundu minarai ba orsamentu estadu iha lei fundu minarai, signifika iha kualker governu labele uza de’it lei orsamentál nomós lei jestaun finanseira ne’ebé hakat liu lei fundu minarai iha artigu sira ne’ebé mensionadu.

“Artigu ida ne’e totalmente la fó dalan ba governu hodi bele foti osan sein liu Orsamentu Jerál Estadu ano fiskál. Signifika, hodi foti osan fundu minarai iha tinan ida só bele halo proposta dala ida liuhusi Orsamentu Jerál Estadu ba tinan ida nian, ne’ebé mak hetan ona aprovasaun husi Parlamentu Nasionál liuhusi debate orsamentál”, katak José Alves da Costa.

Maske nune’e, José Alves akresenta ita monu iha inserteza polítika ida ne’ebé mak lori tempu naruk, presiza konsidera no husu ba orgaun kompetente sira atu konsistente ho lei ida ne’e, tanba lei ne’e mak bele garante sustentabilidade ba fundu minarai ninian.

“Luta Hamutuk mós hanoin katak buat sira ne’e mosu, tanba arogánsia no ego husi lider polítiku sira; tenke hapara ona nune’e bele kria pás no estabilidade ekonomia, sósiu no kulturál iha rai doben ida ne’e ne’ebé ita-nia saudozu sira sakrifika sira-nia vida tomak hodi sosa kotuk ukun aan ida ne’e”, katak tan.

Nune’e, iha fatin hanesan, Organizasaun Naun Governamentál (ONG), Luta Hamutuk, liuhusi konferénsia imprensa husu ba Parlamentu Nasionál (PN) no governu harii fundu kontijénsia iha Timor-Leste (TL).

“Husu ba Parlamentu Nasionál no governu hodi harii fundu kontijénsia ne’ebé hamriik independentemente hanesan mós fundu minarai iha Timor-Leste, ne’ebé nia fontes orsamentu la’ós mai husi fundu minarai”, José Alves da Costa husu perante mídia.

Nune’e mós, husu ba PN nu’udar orgaun lejisladór atu manten prinsípiu lei fundu minarai nian, nune’e osan husi fundu minarai bele rai ba jerasaun agora no tuir mai. Inklui, ba PN hodi halakon ka hapara lei pensaun vitalísia ba eis titulár sira no husu ba governu hodi halo poupansa ba orsamentu estadu.

Halo poupansa ne’e, tuir Luta Hamutuk, hatuun saláriu atuál husi órgaun haat ho nia membru sira tomak, halo réjime espesiál utilizasaun patrimóniu estadu hanesan kareta sira ne’ebé ho marka Prado V8, Prado TX, no TZ ba de’it prezidente repúblika, primeiru-ministru ho nia ministru sira, prezidente parlamentu nasionál ho nia membru parlamentu sira, prezidente tribunál rekursu no labele fó espasu ba diretór jerál sira hodi uza marka hanesan.

Husu ba governu atu halo leilaun karte Prado V8, TX no TZ inklui kareta ho marka Jeep sira ne’ebé mak diretór jerál sira inklui gabinete prezidente repúblika uza durante ne’e tanba kareta hirak ne’e nia manutensaun karun tebes.

“Husu ba orgaun estadu atu serbisu hamutuk hodi nune’e bele dezenvolve di’ak liutan rai no povu ida ne’e ho dignu iha futuru”, tenik.

Entretantu, tuir komunikadu ne’ebé TATOLI asesu husi Luta Hamutuk, ohin, haktuir organizasuan ne’e hakarak hato’o pontu hirak ne’e ba governu no orgaun sira seluk atu konsidera, tanba públiku konfunde, dúvida no preokupa ho polítika governu da-hitu no da-ualu kona-ba mekanizmu no prosedimentu foti osan husi fundu minarai.

Dokumentu sira ne’ebé mak Luta Hamutuk uza hodi halo analiza mak Proposta Orsamentu Duodésimu, Lei Fundu Minarai, Lei Orsamentál nomós Lei Jestaun Finanseiru.

Jornalista: Rafy Belo | Editora: Rita Almeida

Imajem: Gabinete Luta Hamutuk. Foto: Rafy Belo