DILI: Bainhira governasaun ida
atu la’o di’ak ba oin, tenke tau ema ne’ebé moos. Tanba ne’e, lalika fó
ultimatu ba Prezidente Repúblika (PR), Francisco Guterres ‘Lú Olo’.
Laureadu Nobel da Pás, José Ramos
Horta hateten, nu’udar observadór no eis-Prezidente Repúblika husu ba kada
forsa polítika, kada instituisaun di’ak liu lalika fó ultimatu ba malu, liu-liu
ba Prezidente Repúblika, tanba governasaun ida atu la’o ho didi’ak tenke haree
mós ema ne’ebé ba tuur iha governu.
“Prezidente Repúblika hateten ona
dala barak nia opiniaun, husu ba governu atu haree filafali ba elementu sira
ne’ebé serve iha governu”, dehan nia, iha Palásiu Prezidensiál BairruPité,
horisehik.
Nia hatutan, dala ruma halo ultimatu
depois aumenta tan konflitu iha tensaun laran, tanba bainhira fó 'deadline'
kuandu laiha kapasidade atu rezolve problema polítika ka depois la konsege
implementa entaun laiha maioria atu halo prosesu tomak.
Antes ne’e, partidu Congresso
Nacional Resistencia Timor-Leste (CNRT), fó atensaun ba Prezidente Repúblika
iha loron sanulu atu fó pose ba kuadru membru governu nu’udar solusaun hakotu
impase polítika.
Maski nune’e, haree husi kontestu
legál, tuir Jurista timoroan, Manuel Tilman, bazeia Konstituisaun RDTL Artigu
79 númeru 3 sei hahú prosesu ne’e iha PN husi baluk da lima (1/5) ho
deliberasaun aprovadu tuir maioria baluk tolu rua (2/3) husi deputadu hotu-hotu.
Konstituisaun RDTL Artigu 69
(Prinsípiu kona-ba haketak podér nian) dehan, órgaun soberania sira iha nia
relasaun ba malu no bainhira hala’o knaar, tenke tuir prinsípiu separasaun no
interdependénsia kbiit nian, ne’ebé iha lei inan nia laran.
Nune’e, bazeia ba artigu 106
(Nomeasaun) númeru 2 dehan, membru Governu sira seluk, Prezidente Repúblika mak
sei hili husi Xefe Governu nia proposta.
Ne’e duni, Prezidente Repúblika
la sala, tanba la kontra konstituisaun RDTL. Nune’e, konaba prezunsaun
inosénsia la’ós kompeténsia husi Prezidente Repúblika.
Tanba ne’e, Prezidente Asosiasaun
Majistratura Jurídiku Timor-Leste (AMJTL), Antonino Gonçalves hateten, atu lori
Prezidente Repúblika ba tribunál sidadaun hotu-hotu iha diretu maibé tenke iha
fundamentu.
Kazu polítiku tenke buka solusaun
polítika, kuandu haree laiha solusaun no ne’e viola konstituisaun ka lei sira
bele lori ba tribunál para deside. Maibé, Partidu CNRT sira mós tenke
fundamentu tanba saida mak sira tenke lori ba tribunál, Prezidente Repúblika viola
lei saida tenke esplika.
Ne’e duni, Deputadu Partidu
Demokrátiku (PD), Mariano ‘Assanami’ Sabino, sujere katak, atu hakotu impase
polítika ne’e dalan úniku atu uza maka tenke hasoru malu halo diálogu ho fuan
no laran oinsá atu buka duni solusaun.
Partidu polítiku ne’e hanesan
instrumentu demokrasia, tanba ne’e kuandu eleisaun remata ona partidu polítiku
sira tenke buka malu hodi halo diálogu, maibé tenke ho totalidade labele ba
halo fali ‘tawar menawar’ iha momentu diálogu ne’e.
Tuir Assanami, diverjénsia
polítika husi lider nasionál sira ne’e uitoan de’it, maibé tanba interese grupu
balun nian hodi dada ona impase ne’e atu besik ona tinan rua.
Votu ne’ebé maioria povu fó ne’e
tenke nakfilak sai servisu ho responsabilidade, labele uza povu hodi atinji mehi
polítiku sira nian de’it.
Atu ema labele sama beibeik povu
ne’e nia dignidade, lideransa nasionál sira tenke halo ona diálogu karik la
halo timoroan kontinua fahe malu na'i ulun boot sira nia dapur laran di'ak
hela, maibé povu iha baze kontinua terus.
Cristina Ximenes | Independente
Sem comentários:
Enviar um comentário