Kooperasaun Igreja ho Governu, Núnsiu Vizita PM Taur

DILI, (TATOLI) - Núnsiu Apostolic, Joseph Salvador Marino halo vizita kortezia ba Primeiru-Ministru (PM), Taur Matan Ruak, hodi ko’alia konaba kooperasaun Igreja Katólika no Governu Timor-Leste.

Joseph esplika objetivu hosi enkontru ne’e mak atu ko’alia kona nasaun no povu nia di’ak.

“Agradese ba Primeiru-Ministru tanba simu ha’u nia vizita kortezia ida ne’e. Ami ko’alia barak konaba kooperasaun igreja katólika no Governu Timor-Leste, ne’ebé servisu hamutuk ba nasaun no povu nia di’ak”, tenik hafoin hasoru malu ho Xefe Governu iha Palásiu Governu, tersa ne’e.

Vizita ne’e mós hanesan sentidu no parte ida husi akordu bilateral ne’ebé asina ona entre Santa Sé no Governu Timor-Leste. Akordu ne’e estabelese ona ajuda finanseiru ne’ebé governu konsege halo kada tinan ba Igreja Katólika, ba obra sosiál no edukativa no Igreja Katólika oferese ba povu no nasaun Timor-Leste.

Biban ne’e, parte rua ne’e mós ko’alia konaba interese komún sira no Núnsiu Apostolic ne’e dezeju PM, Taur Matan Ruak bele servisu ho di’ak tanba kargu ne’ebé asume daudauk hanesan responsabilidade boot ba nasaun.

Entretantu iha loron 14 agostu 2015, Governu Timor-Leste no Santa Sé liuhosi Sekretáriu Estadu Vatikanu, Kardeál Pietro Parolin asina akordu ida no ratifika husi Parlamentu Nasionál Timor-Leste  iha loron 26 outubru 2015, no publika ona hanesan Rezolusaun Parlamentu Nasionál no. 18/2015 11 novembru 2015.

Tuir portal ofisial governu, akordu ne’e estabelese kuadru jurídiku ba relasaun entre Repúblika Demokrátika Timor-Leste ba Santa Sé, hodi rekoñese papél istóriku importante no kulturál iha Timor-Leste no halo tranzmisaun kle’an relijiaun Katólika nian iha sosiedade timoroan. Respeita, maski, prinsípiu liberdade relijiaun no separasaun Igreja no Estadu nian.

Nune’e mós akordu ne’e define no garante estatutu Igreja Katólika nian no regula área oin-oin, inklui matrimóniu kanóniku, fatin orasaun nian, instituisaun katólika sira edukasaun no formasaun nian, hanorin relijiaun nian iha eskola sira, atividade igreja nian hodi tulun kiak sira, servisu pastorál iha Forsa Armada sira nian no iha penitensiária no ospitál sira, no sistema fiskál no patrimonial.

Jornalista: Julia Chatarina | Editór: Manuel Pinto

Imajen: Núnsiu Apostolic, Joseph Salvador Marino halo vizita kortezia ba Primeiru-Ministru (PM), Taur Matan Ruak, hodi ko’alia konaba kooperasaun Igreja Katólika no Governu Timor-Leste.