Kargu Xefi Estado Maior Jeneral seidauk bele fo ba jerasaun foun | Lere: Hau prontu kontinua

Vise Prezidente Komisaun B ba asuntu Defeza no Seguransa, deputadu Cornelio Gama ‘L7’, hateten, kargu Xefi Estadu Maior Jeneral Falintil-Forsa Defeza Timor-Leste (F-FDTL) ne’ebé dadaun ne’e assume husi Lere Anan Timur, seidauk bele entrega ba jerasaun foun, tanba nasaun sei iha risku bainhira asuntu fronteira ho nasaun viziñu sira seidauk rezolve hotu.

“Kuandu atu entrega ba jerasaun foun ita tenke rezolve lai problema sira, hanesan nasaun ne’e, segundu ita tenke haree fronteira husi tasi, lalehan no rai maran, se ita seidauk haree hotu, ezemplu agora ita nia maun Xanana haree fronteira, oinsa seidauk hotu, kuandu seidauk hotu mak fó ona jerasaun foun, bainhira haree malu ladi’ak sei estraga nasaun, tanba ema balun husi nasaun seluk mai atu hatun fali imi (jerasaun foun) iha rai laran ne’e, ne’ebé ami seidauk iha hanoin atu troka maior Jenerál,” deklara deputadu Cornelio Gama ‘L7’, ba jornalista iha PN, Kuarta (17/10/2018) ne’e.

L7 haktuir, bainhira atu halo mudansa ba estrutura F-FDTL nian, tenke koordena ho komandante rejiaun sira, atu nune’e hili ema ne’ebé nakonu ho neon nasionalismu no patriotismu hodi serví instituisaun Defeza ne’e ho lolos no garante paz no estabilidade.

 “Atu hasai mandatu majór jenerál Lere ne’ebé luta 24 anos, tenke konvida I no II komandante rejiaun 1, komandante rejiaun 2, inklui rejiaun 3 no 4 hodi tur hamutuk atu tau ideias foun ida, para ama duni mak hili ema ne’ebé patriotismu no nasionalismu, nune’e labele halo erru ne’ebé 1974 to’o 1991 liman foer ne’e ami la konkorda, tanba nasionalismu no patriotismu ne’e tenke respeita povu, nasaun no hantene dignifika na’i ulun sira, no tenke komanda forsa atu labele mosu violensia iha Timor,” hateten L7 ba jornalista.

Veteranus ne’e subliña, bainhira atu halo mudansa iha instituisaun F-FDTL mak latau konsiderasaun ba komandante rejiaun sira, sei afeita ba nasaun no liu-liu jerasaun foun.

“Seidauk bele troka, tanba sira seidauk konvida ami rejiaun sira, bolu ami tur hamutuk para dadalia oituan hodi tetu, tanba interese nasaun nian, ami lakohi ema ida mak tur ba hili de’it, ami lakohi ema ne’ebé liman foer mak tau iha ne’eba ami la konkorda, tanba sela’e foti an demais bele estraga nasaun ne’e,” tenik II komandante rejiaun 3 ne’e.

Hafoin VIII Governu konstitusional diskute no aprova proposta iha konsellu ministru, aprezenta ona ba Prezidente Repúblika Francisco Guterres Lú Olo, hodi tetu mandatu Xefi Estadu Maior Jenerál Falintil-Forsa Defeza Timor-Leste (F-FDTL) bazeia ba kompetensia Xefi Estadu nian ne’ebé hatur ona iha konstituisaun RDTL.

Konaba mandantu Xefe Estadu Maior Jenerál F-FDTL, Majór Jenerál Lere Anan Timur, ne’ebe remata ona ne’e, iha Tersa semana ne’e Prezidente Repúblika (PR), Francisco Guterres ‘Lú Olo’, hala’o enkontru ho  Konsellu Superior Defeza no  Seguransa (KSDS) hodi rona opinaun husi KSDS.

Tanba tuir artigu Artigu 85.⁰ konstituisaun RDTL haktuir kona-ba Kompeténsia rasik Prezidente Repúblika nian iha alinea (B) katak, Hala’o kompeténsia kona-ba knaar Komandante Supremu Forsas Armadas nian; no iha fali  artigu 86.⁰ Kompeténsia Prezidente Repúblika nian kona-ba órgaun sira seluk ne’ebé haktuir iha alinea M katak, tuir proposta Governu nian, Xefe Estadu Maiór Jenerál Forsa Armada, Vise Xefe Estadu Maiór Jenerál Forsa Armada no Xefe Estadu Maior Forsa Armada nian, rona tuir, iha kazu ikus mai ne’e, Xefe Estadu Maiór Jenerál Forsa Armada nian. No tuir fali Artigu 90.⁰ kona-ba Konsellu-Estadu iha alinea dahuluk hatete katak, Konsellu Estadu mak órgaun konsulta polítiku Prezidente Repúblika, ne’ebé nia rasik prezide.

Lere: Hau prontu kontinua

Atual Xefe Estadu Maior Jenerál Falintil-Forsa Defeza Timor-Leste (F-FDTL), Maijor Jenerál, Lere Anan Timur hatete nia  prontu asumi hikas kargu Xefe Estadu Maior Jeneral bainhira Prezidente Repúblika, Francisco Guteres ‘Lú Olo’ fo konfiansa ba nia.

Lia hirak ne’e hato’o husi Xefe Estadu Maior Jenerál F-FDTL, Maijor Jenerál, Lere Anan Timur hafoin halao enkontru semanal ho Prezidente Repúblika iha Palaçio Prezidensial, Bairo-Pite, Dili, Kuarta (17/10/18).

“Ita hein deit desizaun prezidente nian bele semana ne’e ou semana oin mai, mais ba hau nia pozisaun hau prontu kuandu prezidente hanesan komandante sumpremu deside no hau nia saúde mós sei permite kualker servisu saida mak Governu fó mai hau prontu, kuandu hau dehan la bele ka foti liman kuandu hau nia saude la permiti ona,’’ hatete Maijor Jenerál, Lere Anan Timur ba jornalista sira.

Maske VIII Governu konstitusional diskute no aprova proposta iha konsellu ministru, aprezenta ona ba Prezidente Repúblika Francisco Guterres ‘Lú Olo’, hodi tetu mandatu Xefi Estadu Maijor Jenerál F-FDTL no KSDS mós halo ona reuniaun ho Prezidente Francisco Guterres ‘Lú Olo’, maibé dadaun ne’e seidauk iha desizaun husi Prezidente ne’ebé sei deside tuir nia kompetensia hanesan xefi estadu nian ne’ebé hatur ona iha konstituisaun RDTL.

Iha loron Tresa (16/10) Konsellu Superior Defeza Seguransa (KSDS) halo ona reuniaun ho Prezidente Repúblika Francisco Guterres ‘Lú Olo’ hodi koalia kona ba nomeisaun xefi  estadu maijor Jenerál nian no nomeisaun xefi estadu maior nian, maibé to’o agora rezultadu seidauk iha. Say

GMN TV | Grupo Média Nacional