PR Konsidera Falur Iha Kualidade Profisionál

DILI, (TATOLI) – Prezidente Repúblika (PR), Francisco Guterres Lú Olo, afirma Brigadeiru Jenerál Falur Rate Laek, ema ida ho kualidade profisionál aas tebe-tebes hodi hala’o kna’ar komandu no Estadu Maiór nian no matenek boot kona-ba realidade FALINTIL-FDTL, liu-liu iha diresaun no akompañamentu ba Kuartél Jenerál nia lala’ok.

“Ida-ne’e atu dehan katak nia iha kompeténsia atu kaer kna’ar aas ne’ebé maka fó fiar ba nia. Tanba ne’e maka ha’u hakarak hato’o ha’u-nia votu susesu hodi hala’o ninia misaun”, Xefe Estadu hato’o dehan liuhusi ninia diskursu hafoin fó pose ba Brigadeiru Jenerál Falur Rate Laek atu asume kargu Vise Xefe Estadu Maior Jenerál F-FDTL.

Nia haktuir Brigadeiru Jenerál Falur Rate Laek, uluk hanesan asuwa’in funu-na’in FALINTIL nian iha luta ba libertasaun nasionál, ofisiál ida ho karreira ida-ne’ebé furak tebes hodi serbí Forsa Armada no Nasaun.

“Ha’u husu ba Brigadeiru Jenerál Lere Anan Timur no no ilustri emposadu fahe lisuk esperiénsia ne’ebé riku tebes durante ita-nia luta ba libertasaun nasionál. Ha’u fiar hosi ne’e ba oin sira na’in-rua (Lere no Falur) sei hamutuk nafatin atu hasoru dezafiu sira ne’ebé maka iha oin, hodi hametin forsa ida ne’ebé modernu no tuir realidade nasaun nian”, Lú Olo tenik.

Nu’udar Xefe Estadu no Komandante Supremu Forsa Armada sira-nian, nia afirma sempre haka’as án atu tane aas Forsa Armada sira-nia naran-kmanek no dignifikasaun, tanba konsidera nu’udar importante tebes hodi hametin koezaun no unidade Estadu nian no haforsa identidade timoroan.

Jornalista: Xisto Freitas | Editora: Rita Almeida

Imajen: Prezidente Repúblika, Francisco Guterres Lú Olo, bainhira halo diskursu iha seremónia toma pose Vise Xefe Estadu Maior Jenerál F-FDTL, Falur Rate Laek, ne’ebé hala’o iha Palásiu Prezidensiál, segunda (1/10/2018). Imajen António Gonçalves