DILI, (TATOLI) – Ministériu Negosiu
Estranjeiru no Kooperasaun (MNEK), ohin kontinua halo konsultasaun polítika
adezaun Timor-Leste ba organizasaun nasaun sira iha sudeste áziatika
(ASEAN-sigla inglés) ho liña ministeriál iha otel Novu Turizmu.
Ministru Negosiu Estranjeiru no
Kooperasaun, Dionísio da Costa Babo Soares, hatete polítika adezaun la’ós MNEK
nian mesak maibé polítiku Estadu, tanba ne’e tenke hetan kooperasaun,
kolaborasaun no aseitasaun bainhira atu implementa polítika ne’ebé iha relasaun
ho adezaun.
“Ita sei lansa programa ida naran
Timor-Leste ASEAN mobilization para hatudu katak ita iha duni esforsu
depois sei lori ba Konsellu Ministru aprova hodi hahú tinan ne’e ba oin hodi
halo atividades oioin”, dehan ministru ba jornalista sira, ohin.
Tuir nia sosiedade barak iha ASEAN
seidauk koñese Timor, tanba ne’e polítika governu da-ualu sei nomea
reprezentante permanente ida ba ASEAN hodi halo kampaña kona-ba Timor-Leste no
polítika adezaun ba organizasaun refere iha tempu besik.
Nia akresenta liután enkontru
ohin akontese atu hetan apoia hosi ministériu hotu ba programa mobilizasaun
hodi implementa atividade oioin ba suporta polítika Estadu ba adezaun, tanba
ekipa ASEAN sei halo avaliasaun ba preparasaun TL iha área polítika, ekonomia,
seguransa no sosiu kultura iha tempu besik.
Governante mós haktuir rezultadu
avaliasaun ne’e maka sei justifika prontidaun TL tama ba ASEAN.
Jornalista: Agapito dos Santos | Editora:
Rita Almeida
Imajen: Ministru Negósius
Estranjeirus no Kooperasaun Dionísio da Costa Babo Soares. Imajen António
Goncalves
Sem comentários:
Enviar um comentário