“Mundu La’ós Ita Nian, Asaun Mak Determina Personalidade”

DILI, (TATOLI) – Matan been despedida hosi funsionáriu públiku ne’ebé durante ne’e destaka iha Radiu Televizaun Timor-Leste, Emprensa Públika (RTTL,EP) ‘hafalun’ salaun Aikurus Binani, Komisaun Funsaun Públiku (KFP) Matadoru, ohin.

“Ita la’ós nain ba mundu, maibé nain ba asaun, tanba ita nian asaun mak determina ita nian personalidade. Susar tebtebes asiste situasaun ne’e”, katak Komisária KFP, Maria Domingas Alves Fernandes Mikato, bainhira enkoraza funsionáriu sira iha serimonia termu entrega funsionáriu públiku 105 ne’ebé durante ne’e destaka iha Radiu Televizaun Timor-Leste, Emprensa Públika (RTTL,EP).

Nia husu ba funsionáriu sira ne’e atu orgullu tanba hanesan pioneiru hodi konstrui ba konstrusaun Estadu durante haknaar án iha RTTL.

Nia dehan tan situasaun ne’e hanesan pasu dahuluk ne’ebé akontese iha instituisaun Estadu, tanba sei akontese mós iha instituisaun Estadu seluk, kuandu mosu polítika Estadu hodi transforma institutu públiku ba emprensa públika.

Nune’e mós, Komisáriu José Telo ne’ebé agora dadaun nu’udar Prezidente Interinu KFP, hatutan KFP sei la abandona rekursu sira ne’e, tanba funsionáriu sira ne’e la’ós bainaka iha KFP.

“Imi mak nain ba administrasaun publika”, afirma. Hodi hatutan komisáriu sira nomós polítiku sira mak bainaka iha instituisaun Estadu tanba sira mai ho mandatu tinan lima de’it.

Sekretáriu Estadu Komunikasaun Sosiál, Merício Juvenal dos Reis Akara, husu ba funsionáriu sira atu labele lakon ispirítu hodi serbí Estadu no povu.

Nia mós rekoñese funsionáriu sira ne’e nu’udar rekursu ne’ebé preparadu atu instituisaun Estadu seluk utiliza.

Entretantu, eis-jornalista seniór RTTL, Paulino Kintas, espresa ninia sentimentu triste hodi hatete kumpre desizaun polítika ne’ebé hatun ona. Tanba ne’e nia hatutan hodi husu ba jornalista sira iha RTTL,EP atu kontinua lori instituisaun Estadu ne’e ba oin ho di’ak hodi serbí nasaun no povu.

Nia mós fó hanoin fali ba polítiku sira atu tau loloos rekursu iha ninia fatin (the right man, the right place), se konsidera rekursu umanu ne’e mak mákina ba Estadu.

Funsionariu públiku ne’ebé durante ne’e destaka iha RTTL,EP hamutuk 105, funsionáriu 41 koloka ba SEKOMS no 64 iha KFP.

Jornalista: Agapito dos Santos | Editora: Rita Almeida

Imajen: Komisária KFP, Maria Domingas Alves Fernandes Mikato, bainhira enkoraza funsionáriu sira iha serimonia termu entrega funsionáriu públiku ne'ebé durante ne'e destaka iha RTTL,EP. Imajen António Goncalves