Lere Rekoñese Susesu-Dezafiu Iha FDTL

DILI, (TATOLI) – Durante tinan 18 trabsformasaun Forsa Gerilleiru FALINTIL ba forsa defeza Timor-Leste ida profesionál hanaran FALINTIL-Forsa Defeza Timor-Leste (F-FDTL), atinje ona susesu lubuk ida maibé sei rekoñese dezafiu ne’ebé enfrenta.

Susesu ida maka transforma forsa armada ida profesionál maske sei hasoru problema rekursu umanu, garante estabilidade ba nasaun no hametin parseiru ho nasaun seluk inklui mós partisipasaun forsa iha misaun pás Organizasaun Nasaun Naklibur sira (ONU-sigla portugés).

Dezafiu maka problema ekipamentu, infraesrutura bázika, hadi’a kondisaun moris forsa sira nian bo orsamentu.

Xefe Estadu Maiór F-FDTL, Majór Jenerál Lere Anan Timur, hatete dezafiu ida maka krize 2006 hodi afeta ba estabilidade nasionál.

Nia afirma situasaun 2006 nu’udar lisaun ba komandu hodi hadi’a di’ak liután profesionalizmu to’o ohin hodi garante estabilidade iha nasaun.

Atu hadi’a, dezenvolve instituisaun ne’e atu sai profesionál liútan maka planu hadia konseitu estratejia militár bazea hosi konseitu defesa seguransa nasionál.

“Hosi konseitu defeza nee maka define sistema ba forsa, despozitivu ba forsa, mellora kapasidade forsa armada”, dehan Lere ba jornalista sira hafoin serimonia aniversáriu transformasaun FALINTIL ba FALINTIL-FDTL ba dala 18 iha Fatuhada, ohin.

Lere husu ba nembru F-FDTL sira atu komunga nafatin dutrina FALINTIL sira hodi hadi’a án sai profesionál liután ba servi povu no Estadu.

“Parabéns ba veteranu sira ne’ebé hahú 2001 iha Aileu no to’o 2015 balun ba reforma no balun ohin ba rezerva liuhosi dedikasaun, sakrifisiu durante okupasaun tinan 24 iha ai-laran to’o ukun án”, dehan Lere.

Majór Jenerál Lere rekomenda mós ba ezekutivu atu investe maka’as ba dezenvolvimentu instituisaun ne’e tanba sai pilar importante ba estabilidade nasionál.

Selebrasaun ne’e, Komandu F-FDTL mós hasai karta forsa rezerva ba forsa veteranu nain lima hodi deskansa hanesan Sarjentu Pascoal Ximenes Pereira, Sarjentu Aniceito da Camaraho, Sarjentu Silvino Soares dos Anjos, Segundu Sarjentu Domingos Pinto no Antonio Pinto, tanba kondisaun saúde la permite atu kontinua involve iha instituisaun.

Tuir estatutu F-FDTL fó dalan ba forsa veteranu sira atu desksansa iha uma ho idade 45 ho forma forsa rezerva maibé ba forsa joven sira bele husu forsa rezerva iha tinan 55 no reforma ho tinan 60.

Iha biban hanesan Komandu F-FDTL atribui sertifikadu no boña rekoñesementu ba veteranu nain ualu kompostu hosi José Noronha, Tomas Madeira, José Maria, Rosario de Jesus, Adão Soares, Miguel da Costa Abilio Tilman no Mateus dos Santos ne’ebé sai inisiadór banda ba instituisaun F-FDTL iha tinan 18 liubá.

Entretantu, seremonia ne’e partisipa hosi Prezidente Repúblika, Prezidente Parlamentu Nasionál, membru Governu, Korpu Diplomatiku, veteranu sira, Panglima TNI Hadi Tjahjanto, Xefe Estadu Maiór Japaun, Tenente Jeneral Takashi Moto Matsu, no konvidadu seluk.

Jornalista: Agapito dos Santos | Editora: Rita Almeida

Imajen: Majór Jenerál F-FDTL, Lere Anan Timur, iha selebrasaun transformasaun FALINTIL ba FALINTIL-FDTL ba dala 18 iha kuartel jerál Fatuhada, ohin. Imajen António Gonçalves