FRETILIN-PLP-KHUNTO konsidera grupu Angela hakiak hahalok subversivu

Bankada FRETILIN-PLP-KHUNTO konsidera grupu Angela Freitas hakiak hahalok subversivu

DILI, 01 setembru 2020 (TATOLI) -- Bankada Frente Revolusionária Timor-Leste Independente (FRETILIN), Partidu Libertasaun Populár (PLP) no Kmanek Haburas Unidade Nasionál Timor Oan (KHUNTO) konsidera grupu Angela Freitas hakiak hahalok subversivu.

“Bankada FRETILIN, PLP no KHUNTO hanoin katak ida-ne’e kestaun sériu, no Estadu tomak tenke hola pozisaun no medida forte sira hasoru ema sira-ne’ebé hakarak atu hakiak hahalok subversivu hasoru Estadu ida-ne’ebé liu ema rihun atus rua (200.000) mak lakon sira-nia vida atu harii,” Xefe Bankada FRETILIN Deputadu Francisco Miranda Branco, akompaña hosi Xefe Bankada PLP Deputadu Francisco Vasconcelos no Xefe Bankada KHUNTO Deputada Olinda Guterres, informa liuhosi Konferénsia Imprensa, iha Parlamentu Nasionál, tersa ne’e.

Bankada Governu nian ko’alia kestaun ne’e tanba iha loron 10 fulan-agostu tinan-2020 liubá, Angela Freitas, ho nia grupu ne’ebé hanaran “Rezisténsia Nasionál Defende Justisa no Konstituisaun RDTL” hasai deklarasaun ida-ne’ebé ameasa Prezidente Repúblika, Francisco Guterres “Lú-Olo” atu rezigna-aan maibé ida-ne’e la akontese, sei uza meiu hotu-hotu atu obriga hatún Prezidente Repúblika.

Iha deklarasaun ida-ne’e, Angela Freitas ho nia grupu obriga Prezidente- Repúblika atu rezignaan, sira “sei mobiliza masa hosi munísipiu hotu tún ba Díli hodi hatún obriga hosi ninia kargu nu’udar Prezidente-Repúblika.”

Bankada parlamentár tolu ne’e haktuir, grupu refere deklara, “forsa no polísia sira-ne’ebé hola parte ona grupu movimentu nasionál ne’ebé lideradu hosi komandante no ofisiál sira sei utiliza arma ne’ebé iha, obriga Prezidente tún hosi ninia kargu.”

Nune’e mós bainhira hetan reasaun hosi apoiante Francisco Guterres Lú-Olo, sei utiliza grupu arte-marsiál no arte-rituál sira destabiliza situasaun rai-laran nune’e fó presaun ba Prezidente Repúblika.

“Maibé, se laiha hotu dalan, tenke hamosu duni revolusaun ka funu nu’udar dalan ba halo mudansa ba sistema antí-demokrátiku iha Timor-Leste no elimina hotu apoiante anti demokrátiku liuhosi forsa no polísia-ne’ebé apoia ona movimentu ne’e. Deklarasaun ida-ne’e asina hosi Angela Freitas, António Ai-tahan Matak no Lucas Soares Colibere,” haktuir Bankada parlamentár tolu ne’e.

Bankada FRETILIN, PLP no KHUNTO konsidera deklarasaun ida-ne’e ninia tón no linguajen nakonu ho liafuan no espíritu subversivu ne’ebé obriga Prezidente-Repúblika ida atu tún hosi kargu no ameasa sei uza grupu arte-marsiál ho arte-rituál sira ba destabiliza situasaun iha railaran, deklara atu uza forsa no polísia ba elimina sidadaun seluk no hakarak atu hamosu funu iha Timor-Leste.

Deputadu Francisco Miranda Franco afirma, deklarasaun hanesan ne’e labele halo hosi ema patrióta timoroan ne’ebé hadomi povu no rai ida-ne’e.

Reprezentante Bankada FRETILIN, PLP no KHUNTO ne’e hatete, deklarasaun atu destabiliza situasaun seguransa rai-laran, uza elementu polísia ho militár sira atu elimina ka hakotu ema seluk nia vida até ameasa atu halo funu ne’e konstitui ona áktu subversivu.

Sira ne’e dehan, Angela Freitas ho nia grupu atu defende Konstituisaun RDTL maibé hakarak lori forsa no kilat obriga atu hatún Prezidente Repúblika.

Deklarasaun ida-ne’e reklama mós katak sira hasai dokumentu ida-ne’e lori estrutura partidu CNRT nia naran, Partidu Demokrátiku nia naran, estrutura ierárkia Igreja Katólika nia naran, Instituisaun Defeza no Seguransa nian no emprezáriu nasionál sira-nia naran.

“Bankada FRETILIN, PLP no KHUNTO apresia no louva konferénsia Imprensa ne’ebé ierárkia Igreja Katólika iha Timor-Leste hato’o liuhosi Porta Vóz Konferénsia Episkopál Timorense nian Arche Bispu Metropolitana Díli, Dom Virgílio do Carmo da Silva katak Igreja Katólika deskoñese no la hola parte iha movimentu ida-ne’e,” nia dehan.

Bankada FRETILIN, PLP NO KHUNTO hein katak Partidu CNRT no Partidu Demokrátiku ne’ebé maka deklarasaun ida-ne’e temi sira-nia naran iha dokumentu bele pronúnsia ba públiku kona-ba sira-nia pozisaun relasiona ho dokumentu ida-ne’e.

Bankada FRETILIN, PLP no KHUNTO iha Parlamentu Nasionál husu mós ba Xefe Estadu-MaiórJenerál F-FDTL nian, Majór Jenerál Lere Anan Timur no Komandante Jerál PNTL, Komisáriu Polísia Faustinho da Costa atu esklarese ba públiku se loos duni ka lae membru F-FDTL no PNTL ‘sorin balun’ ba hamutuk ona ho grupu Angela Freitas nian atu destabiliza situasaun, elimina Timoroan sira no atu halo funu hasoru Estadu RDTL nian.

“Ida-ne’e hatudu katak sidadaun Timor-Leste hotu-hotu presiza atu iha edukasaun sívika, polítika patriótika atu hadomi ita-nia rai doben ida-ne’e”, hateten Xefe Bankada FRETILIN, Francisco Miranda Branco.

Jornalista: Evaristo Soares Martins | Editór: Cancio Ximenes