PNTL aseita pedidu RNDJK halo “manifestasaun” hasoru PR Lú Olo

DILI, 31 agostu 2020 (TATOLI) -- Komandu Polísia Nasionál Timor-Leste (PNTL), ohin, aseita ona pedidu asaun “manifestasaun” husi Grupu Rezisténsia Nasionál Defende Justisa no Konstituisaun RDTL (RNDJK) hasoru Prezidente Repúblika, Francisco Guterres Lú-Olo, ne’ebé termina ona atu halo durante loron-15 iha kampu boot TasiTolu, Dili.

Komandu PNTL konsidera katak, asaun pasífiku ne’ebé RNDJ organiza hodi mobiliza manifestante husi munisípiu 12, inklui Rejiaun Administrativu Espesiál Oe-Cusse Ambeno (RAEOA) ne’ebé sei halo husi loron 4 to’o loron 18 setembru 2020, presiza iha fatin luan atu evita engarrafamentu.

Portavós Komandu Jerál PNTL, Superintendente Xefe Arnaldo Araújo, husu atensaun ba grupu RNDJK atu kontrola membru sira dixiplina, inklui halo asaun kumpre nafatin regra saúde nian hodi evita aan husi propagasaun COVID-19.

Nia dehan, PNTL haree ona karta pedidu asaun pasífiku RNDJ-KRDTL prienxe ona rekizitu tuir lei númeru 01 artigu 5.

“Manifestasaun sei hahú iha loron 04 to’o loron 18 setembru 2020 iha Tasi-Tolu, atu ami bele fó seguransa ba sira ho di’ak,” hateten Superintendente Xefe Arnaldo de Araújo, ba jornalista iha Kuartél Jerál PNTL, Caicoli, Dili.

Arnaldo dehan, PNTL sei mobiliza nia forsa husi unidade polísia nian ne’ebé eziste no hetan apoiu seguransa mós husi Unidade Espesiál Polísia (UEP).

Iha fatin hanesan portavós RNDJ-KRDTL, Angela Freitas hato’o agradese ba PNTL hodi fó lisensa ba sira-nia asaun no sira mós prontu koopera ho PNTL hodi asegura seguransa iha asaun la’o ho di’ak liután.

“Ita iha serteza ona katak, iha sesta 04 setembru 2020 sei halibur masa populár husi munisípiu 12, inklui RAEOA sei konsentra iha kampu Tasi-Tolu no polísia sei fó seguransa másimu tuir akordu ne’ebé ami mai aprezenta ona ba PNTL,” Angela Freitas hateten.

Angela dehan, asaun ne’e sei partisipa direita husi populasaun sira, inklui reprezentante veteran sira, sosiedade sivíl no grupu partidu polítiku sira iha TimorLeste.

“Ema ne’ebé atu tuir manifestasaun mai husi komponente hotu-hotu hanesan veteranu, sosiedade sivíl, partidu polítiku, akadémiku no komunidade, tanba ne’e ami prepara ona lojístika atu fasilita masa husi munisípiu sira atu mai tuir manifestasaun tuir regra ne’ebé ami hato’o ona ba PNTL,” Angela Freitas tenik.

Angela dehan, mezmu asaun ne’e sira halo lider partidu polítiku balun la aseita, maibé hanesan sidadaun sira sei prepara karta petisaun hodi hato’o ba Prezidente Repúblika, Francisco Guterres “Lú Olo” nu’udar aman ba nasaun atu koopera hodi rezolve krize polítika iha rai-laran.

Jornalista: Eugénio Pereira | Editór: Francisco Simões

Notísia Relevante:

RNDJK husu autorizasaun polísia atu “demo” hasoru PR Lú Olo