PENSAUN VITALISIA SEI HAMOUT ESTADU MUDA KEDAS AGORA

Sosiedade Sivil husu ba Partidu sira ne’ebé mak hetan kadeira iha Parlamento Nasional (PN), atu muda ou altera lalais agora kedas lei pensaun vitalisia, tamba sei hamout Estado iha futuru oin mai.

“Ha’u hanoin ita labele lohi demais povu ona ne’ebé hakarak muda pensaun vitalisia tenki muda agora kedas maibé hakarak hein tinan Lima hotu mak muda signifika ita mos hakarak hela pensaun ida ne’e”, hatete diretor Organizasaun Naun Govermentais (ONG), Asia Justice And Rights (Ajar) José Luís de Oliveira ba JN-Diário iha nia kna’ar   fatin Palapasu Dili, Segunda (14/9).

Tuir sosiedade sivil nia hare ba aban bairua rai ne’e hetan susar no terus povu Timor leste mak sei terus no susar liu,tamba uluk deputadus   sira ne’ebé mak reprezentante povu iha uma fukun Parlamento Nasional iha tempu Primeiru Governo FRETILIN mak halo lei pensaun vitalisia.

Nia dehan, pensaun vitalisia sei halo monu no bangkrut ba Estado nune’e membru Parlamento Nasional (PN) hanoin tenki halo muda polítika lalais hodi muda agora kedas lei pensaun vitalisia.

Diretor Ajara esplika, FRETILIN agora kaer ukun, tamba Prezidenti ZEEMS ema FRETILIN, Ministru Koordenador Ekonomia no Agrikultura ema FRETILIN, no mos Vise Ministru Infra-estrutura, Ministru Negosio Estranjeirus.

Tamba ne’e nu’udar sosiedade sivil husu ba partidu FRETILIN labele hein tan, maibé agora kedas tenki muda lei pensaun vitalisia, wanhira hanoin ba nasaun ne’e nia vida sei naruk nune’e FRETILIN iha oportunidade atu halo negosia ho partidu sira seluk hodi muda lei ne’e.

Nia dehan,agora partidu opozisaun laiha ,tamba sira hotu kaer ukun ne’e duni nia husu labele lohi povu demais, tamba partidu sira seluk hotu hotu uluk hala’o kampanha esplika ba povu katak, sira kaer ukun sei muda lei pensaun vitalisia. Maibé realidade akontese ukun tinan Tolu ho balun ona mos nonok hela de’it.

Diretor sosiedade ne’e hatete razaun sira iha Parlamento Nasional dada halo naruk, tamba sira hanoin sira mak atu hetan uluk, tamba ne’e pensaun vitalisia direitu arqueridu wanhira ita hetan labele muda ona. Tamba sira hotu iha Parlamento Nasional hein to’o tama ba iha fulan 42 sira hetan ona labele lakon ona, tamba tuir lei pensaun vitalisia sira hetan ona ne’e labele lakon ona.

Tamba ne’e nia husu ba konsiensia Estado sé hanoin Estado, tamba pensaun vitalisia sei halo todan ba ita nia Estado iha futuru, tamba ema barukten la hala’o servisu hodi tur no toba de’it hader simu osan. Tamba tur iha kadeira de’it durante fulan 42 simu osan 100% to’o nia rohak laek, maibé ba ema sira ne’ebé mak luta iha funu laran durante tinan 24 la simu osan hanesan sira deputadus iha PN.

Nia informa lei pensaun vitalisia lei ida ne’ebé mak kontra politika FRETILIN rasik, tamba uluk FRETILIN iha 1975 abaixu pequena borgezia, maibé agora lei ne’e hamosu fali pequena borgezia, tamba ema tur de’it simu osan hodi goza.

“Hau husu sira nia konsiensia Estado wanhira iha sentimentu hadomi Estadu, tamba koalia Estado labele hanoin de’it ba ohin loron de’it, maibé tenki hanoin mos ba iha futuru liu liu ba ita nia bei- oan, nia oan sira mos tenki goza”, diretor Ajar ne’e koalia.

Iha parte seluk Dekano Fakuldade Ciensia Sociais Eurico dos Reis de Araujo, hatete pensaun vitalisia laos halakon ,maibé Estado iha dever atu valoriza ema hotu ne’ebé halo ona buat ruma ba rai, nasaun ,no povu ida ne’e.

Tuir dekano ne’e nia hare pensaun vitalisia hamosu preukupasaun oin oin husi sosiedade sivil ,tamba povu Timor Leste sei moris ladiak, tamba ne’e los duni.

Dekano fakuldade ciensia sociais Eurico hatutan tan katak,Estado iha dever atu fo,maibé tenki tetu halo didiak atu nune’e porsaun ne’ebé mak estado fo ne’e labele hamosu injustisa sosial.

Sira merese tenki dignifika sira hodi valoriza sira nune’e sidadaun sira mos tenki sente hamutuk ho Estado katak,buat ne’ebé mak estado fo ne’e sidadaun sira mak fo nune’e tenki sente hamutuk hodi hatene mai husi sidadaun hirak ne’e mak fo.tos

Jornal Nacional