REHABILITA MEDICAL RECORD HNGV

DILI - Atu konserva didiak dokumentu pasiente sira ne’ebé mak durante ne’e ba hala’o tratamentu iha Hospital Nasional Guido Valadares (HNGV) presija konstrui ka rehabilita Medical Record hodi rai dokumentu.

Tuir informasaun ne’ebé mak fó hosi Diretor Apoiu Diagnostika HNGV, Mendes Pinto rekuñese fátin medical record, ne’e problema ida kronika ona komesa kedan óspital ne’e hari to’o agora, fátin ne’e importante tebes átu rezerva dokumentus pasiente sira nian.

Tuir nia kátak, map ida átu tau dokumentus pasiente sira nian dalaruma lakon, tanba fátin átu rai dokumentu iha de’it rai.

“Ne’ebé dokumentus pasiente sira nian maioria rai de’it iha rai, ita iha de’it armariu hira oan, mas óspital halo esforsu hela átu hadi’a medical record, ne’e orsamentu ida bo’ot, tanba uluk ami propoin osan besik $260 mil, maibé tempu besik Ajensia Desenvolvimentu Nasiona (ADN) mak átu hadi’a” Mendes hatete ba jornalista iha nia kna’ar fátin HNGV, Bidau Sexta (18/9).

Planu atu rehabilita fatin ne’e, atu nune’e bele sosa armariu hosi rai dokumentu no sosa komputador no map hosi rai dokumentu pasiente sira nian.

Tuir Mendes katak, iha prosesu rehabilitasaun ne’e presija duni atu kompleta estrutura fatin medical record nian, tanba iha fatin barak mak sei minus hela.

Mendes dehan, planu no levantamentu inklui orsamentu preve hotu ona, tuir planu antes tinan ne’e to’o nia rohan, governu liu hosi nia ajensia ADN sei hadi’a.  

“Sé fátin ne’e mak la asegura, entaun susar atu hadi’a pasiente sira nia dokumentus, entaun dokumentus kuandu lakon atu halo fali trátamentu nia tenke halo foun fali, sé halo foun entaun ema la hatene ona ema ne’e uluk fou-foun nia moras saida no nia hemu aimoruk saida, ne’e la hatene tuir ona” Mendes esplika. 

Tuir planu ba oin sei hadi’a mós fatin lubuk ida iha óspital hanesan poli klinika, hadi’a laborátorium no buát seluk tan.

Liga ba enfra-estrutura Banku de Sangue Nasionál (BSN) tuir diretor ne’e kátak, levantamentu halo hotu ona, mas labele átu bo’ok dala ida, tanba óspital hetan apoiu osan hosi ADN.

Mas BSN, ne’e seidauk tama prioridade ba óspital átu bo’ok agora ho medical record, konaba BSN nian, presija hadi;a estatutu atu bele konsidera haensan unidade ida ketak.(gus)

Timor Post