XANANA HETAN "ATAKE"

Iha loron Kinta (04/09/2015), hafoin ramata partisipa misa dezlutu nasionál iha Igreja Katedral Díli, Eis Primeiru Ministru Kay-Rala Xanana Gusmão hetan atake (hobur) lisuk hosi estudante lubun ida hodi hasai fotografia hamutuk kuaze oras ida resin.

Tuir observasaun Jornál Matadalan, iha  tuku 12: 00 Otl liu hafoin misa ramata, maske loron manas, maibé eis líder karismátiku ne’e nunka sente kolen hodi kontinua hasai fotografia nafatin hamutuk ho estudantes no mós inan-aman balun ne’ebe partisipa iha momentu ne’e.

Estudantes sira hobur tuir no forma hanesan nehek mean hobur masin midar. Hafoin hasai foto, Xanana hatudu ninia kómiku ba estudante sira katak, “Ida (1), rua (2), tolu (3), onkaaa (oin kamera),” Xanana Gusmão hakilar bainhira hasai fotografia. Rona liafuan ne’e, estudante sira hotu hamnasa hasoru nia.

Hafoin ramata hasai fotografia hamutuk ho eis liíder rezisténsia ne’e, estudante Elviano da Costa Pires hosi eskola Sekundária Cristal sente kontente tebes tanba bele hasai foto hamutuk ho Eis Primeiru Ministru ne’e. Nia dehan foto refere sai hanesan lembransa ida ba nia.

“Ha’u sente kontente tebes, tanba foin primeira vez hasoru direta ita nia eis Primeiru Ministru ne’e no bele foto hamutuk ho nia,” dehan estudante ne’e ho laran kontente.

Nia hatutan, nia koñese Xanana hanesan ema ne’ebe ó ninia kontribuisaun boot ba nasaun iha istória luta passadu nian. (Jon)

Matadalan