Aeromosa timoroan nain 5 hahu servisu iha Sriwijaya Air

DÍLI - Governu Timor-Leste liu husi sekretaria estadu politika formasaun professional no empregu – SEPFOPE,  segunda (05/10) ofisialmente   entrega timoroan nain 5, feto 2 mane 3  ba kompañia aviasaun  Sriwijaya Air Indonesia hodi halao servisu hanesan aeromoza ka pramugari. Sekretariu Estadu Ilidio Ximenes da Costa   fó agradese ba Sriwijaya Air tanba  sira loke   odamatan  no  bele servisu hamutuk ho  Estadu Timor-Leste  hodi fo servisu ba timoroan sira iha area aeromoza nian.

“Hau dehan  eis primeiru ministru Kay Rala Xanana Gusmão sadik hau dehan katak,  Ilidio  hau  hakarak iha aviaun laran  hau  rona  ema koalia tetun, hau lakohi atu rona bebeik  bahasa Indonesia, ikus  mai hau realiza duni agora pramugari ne’e iha duni,”  hatete Ilidio ho orgullu. Nia hateten nia parte sente kontenti no orgollu no apresia mos servisu diretór sira tanba liu husi sira nia esforsu rezultadu ikus hatudu pozitivu duni.

“Buat ne’e sai pozitivu  saida mak governu nia hakarak ema  hotu nia hakarak  sira realiza duni, tanba  mehi ne’e laos mehi deit maibe  tenki realiza mehi  sai konkreta,”dehan tan nia. Nune’e mos  aeromosa Francisco Sequeira Salu hatete durante nia tuir formasaun  fulan 6 iha Indonesia bele hatudu ninia prestasaun diak. “Ita bele hatudu prestasaun diak ba ema nia nasaun katak timor mos bele maske  nasaun ne’e foun ida, tanba  pramogaria ne’e foin primeiravez timoroan sai promogaria iha tinan ida ne’e,” nia hateten.

Salu mos  esplika  katak, durante  nia esforsu ohin loron hetan rezultadu duni maibe iha parte ida mos tenki kumpri ema nia lei no servisu tenki  professional. “Servisu ne’e estadu mak haruka ita ba tenki hatudu atetude diak ba ema nia nasaun no mos ba ita nia nasaun foun ida ne’e atu nune’e bele dezemvolve ita nia rai doben,”dehan nia. Nia informa kontratu ne’ebé halo ho kompañia durante tinan tolu  (3) tanba se Timor-Leste mak iha aviaun rasik  nia bele sai fali aeromosa iha aviaun timor nian.

“Karik governu Timor –Leste sosa aviaun hau bele  serve fali hau nia nasaun  ne’e, maibe iha parte ida mos ami iha ne’eba hasuru dezafiu   hanesan lingua tanba  ita  dala barak kolia Tétum, Portugues no Ingles  maibe iha ne’eba ne’e la iha  hakarak ka lakoi tenki aprende bahasa Indonesia,”  nia haktuir. Entretantu diretora ajensia Arvec, Carla Tilman hateten iha inisiu ema barak  husi 13 munisipiu mak kandidataan atu sai   aeromosa  maibe ikus  nain lima deit mak konsege sai aeromosa.

“Edukasaun ne’e minimu ba SMA no  Diploma, tinan 18 to’o 23,  nia alturas mane 170 feto  165. Atividade ne’ebe ami halao durante ne’e  ami intervista  kona-ba attitude lingua no   koñesimentu kona-ba  aeromosa nian,” dehan  Diretora  Arvec ne’e. Iha faze intervista  kompostu husi mane nain 4 feto nain 11maibe  selesaun ba etapa ikus kadidatu hamutuk nain 12  kompostu husi mane nain 4 feto nain 8  sira   ne’e mak lori ba Jakarta  hodi teste kona-ba saude nian maibe nain 6 mak passa  i  ida fali rezigna an ho razaun katak nia moras tanba ne’e mak nain lima  ne’e agora dadauk  sai ona  ba pramugari Timor-Leste.

Nia mos haktuir tan katak,  aeromosa sira tuir formasaun durante fulan  6 iha Bali, iha ne’eba sira aprende baziku kona-ba  Etika, makep  oinsa atu atende ema  iha Aviaun laran, ne’e antes sira aranka ba Jakarta  ne’e  husi SEPFOPE  entrega formador sira no asina moU  entre Arvec ajensia, Sriwijaya Jakarta, hodi haruka sira ba tuir hahu iha 14 februari tinan ne’e ne’ebe fasilita husi pramugaria  Sriwijaya nian. (BT)

Business Timor