TAUR HUSU VETERANUS TENKI HALIBUR MALU

HATOBULICO - Prezidente Repúblika (PR), Taur Matan Ruak kontinua husu ba veteranus sira halibur malu tanba veteranus agora la hanesan iha tempu rezisténsia nia laran, tanba veteranus sira agora komesa haluha malu.

Asosiasaun Veteranus Munisípiu Ainaro dadauk ne’e halibur ona orsamentu hamutuk 130 mill hodi ezekuta ba programa koperativa  asosiasaun veteranus.

Xefi estadu hateten maske funu hotu ona maibe veteranus nia serbisu seidauk hotu kontinua fó kontribuisaun hodi dezemvolve Timor-Leste.

 “Ita sira veteranus sira mós haluha malu ida-ida la’o ninian ona, sa tan ita nia povu sira,”dehan PR Taur iha suku Mulo, Postu Administrativu Hatubuilico, Munisípiu Ainaro Dominggu (18/10), hafoin hala’o vizita ba semitériu saudozu Raul da Cruz Tilman “Tigri Kablaki”.

PR Taur dehan, nasaun no povu ida ne’e, sei lahula veteranus sira nia terus no susar ne’ebé infrenta durante tinan 24 nia laran hodi liberta povu no rai ida ne’e.

PR Taur esklarese, maske funu hotu tiha ona, maibé veteranus nia serbisu seidauk hotu, tanba povu sei moris iha terus no mukit nia laran.

Xefi Estadu husu veteranus sira labele ejiji de’it direitu maibe oinsá maka kontinua serbisu maka’as para bele lori moris di’ak ba povu no nasaun.

Iha fatin hanesan Prezidente Asosiasaun Veteranus munisípiu Ainaro, Gil da Costa hateten,  dadauk ne’e veteranus sira iha munisípiu Ainaro halibur malu ona hodi tau osan gamutuk para bele investe iha área estratejiku sira hodi kontribui ba dezemvolvimentu nasional.

Tanba ne’e veteranus hotu iha munisípiu Ainaro nian halibur ona osan pensaun nian hamutuk 130 mill resin depois maka investe fali iha fatin estrateziku sira.

“Osan ne’ebé ami tau hamutuk to’o ohin loron hamutuk 130 i tall mill maibe maibe ami seidauk halo buat ida tanba osan ne’e sei ho montante kiik,”Prezidente Asosiasaun Veteranus munisípiu Covalima, Gil da Costa informa.

Prezidente Asosiasaun Veteranus ne’e hateten, veteranus sira kontinua tau osan hamutuk depois maka ezekuta ba planu ne’ebé maka asosiasaun hanoin ona.

Nia hatutanasosiasaun ne’e sei tau osan hamutuk tan hanesan uluk ha ailaran tau kilat musan hamutuk para haree fatin estratezia iha maka bele ezekuta par abele hetan susesu.

“Ami sei tau hamutuk tan oituan-oituan depois maka ami bele halo ba programa ruma. Hanesan uluk iha ailaran katak kilat musan tau hamutuk haree fatin di’ak maka foin halo asaltu para hetan susesu,”dehan nia.

Xanana Sei Vizita Abrigu

Iha opurtunidade ne’e, Prezidente Asosiasaun Veteranus ne’e mós deklara katak eis Komandu da Luta, Kay-Rala Xanana Gusmão sei vizita abrigu sira iha Munisípiu Ainaro.

Tanba ne’e, hanesan Prezidente Asosiasaun Veteranus nian halo hela preparasaun ba vizita eis Primeiru Ministru (PM) ne’e nian.

“Ha’u sei fila ba Díli tanba iha serbisu ida, halo preparasaun tanba maun Xanana atu vizita abrigu sira,” Gil da Costa informa.

Enkuantu, Prezidente Repúblika (PR), Taur Matan Ruak husu ba veteranu sira kontinua halibur malu oinsá buka moris di’ak.(dgx)

Timor Post