CPLP ASET UNÍKU TIMOR LESTE BA ASEAN

Comunidade dos Países de Língua Portuguesa (CPLP), hanesan asset ida ne’ebé potensiál tebes ba Timor Leste (TL) atu tama ba ASEAN, tanba TL hanesan nasaun ida ne’ebé mak úniku iha jeográfiku Sudueste Aziátiku.

Vise Ministru Negósius Estranjeirus i Kooperasaun (MNEK), Roberto Soares hateten katak, la difisil atu TL tama ba ASEAN, tanba membru ASEAN balu mós iha interese atu tama ba CPLP.

“Timor Leste úniku nasaun ne’ebé ninia lokalizasaun ne’e, iha geografia sudeste Asiatíku, ne’ebé sai membru CPLP. Tanba ne’e mak, dalabarak ami dehan katak, ida ne’e bele sai hanesan potensial asset Timor ninian, atu bele kontribui ba ASEAN, iha kontestu CPLP nia relasaun, karik Timor Leste sai membru ASEAN iha futuru mai,”informa Roberto Soares ba Jornalista sira iha nia kna’ar fatin MNEK Dili, horseik.

Nia hatutan, iha membru ASEAN nian balun, mak manifesta sira nia interese atu tama ba CPLP, hanesan Indonesia.

“Iha tinan hirak liu ba, eis Prezidenti Susilo Bambang Yudiwono (SBY) manifesta vontade ida ne’ebé hakarak atu ba observa atividades CPLP nian,”relata Roberto Soares.

Nia esklarese, ida ne’e hahú demonstra katak, nasaun ASEAN balun, liu-liu Indonésia iha interese atu sai membru CPLP.

“Ha’u fiar katak, bainhira sira tama ona iha CPLP laran, iha futuru mai, ha’u hanoin sei bele iha tan seluk, atu manifesta sira nia interese hanesan ne’e,” tenik Roberto Soares.

Maibé Roberto dehan, kona-ba interese Indonesia nian ba CPLP ne’e, to’o agora seidauk iha diskusaun klean kona-ba, oinsa nia modalidade atu fó ba Indonesia, atu partisipa iha reuniaun CPLP nian, tanba iha membru CPLP sira seluk sei presiza haree.

Nia esplika, tanba agora dadauk ne’e, membru CPLP sira mós, sei konsentra maka’as tebes ba iha finalizasaun vizaun estratéjika atu bele lori CPLP iha kontestu globalizasaun ninian ne’e, hodi ba oin, CPLP la’os atu haree de’it ba iha kestoens kultura, sosiál no língua, mas bele hakat liu ona, li-liu atu haree ba iha globalizasaun ekonomia iha mundu ohin loron ninian.

Roberto Soares dehan, ho razaun ida ne’e mak, ohin loron CPLP mós sei fó hela nia konsentrasaun ba áreas prioridades iha CPLP nia laran, tanba ne’e mak seidauk diskuti kona-ba nasaun sira balun ne’ebé mak iha interese ba CPLP ne’e rasik.cos

Jornal Nacional