SEJD APROVA PROPOSTA TARDE, SELEBRASAUN LORON SEBASTIÃO GOMES LA REALIZA

Prezidente Komite 12 Novembru, Gregorio Saldanha informa, selebrasaun loron Sebastião Gomes ba tinan ne’e la realija, tanba aprovasaun proposta selebrasaun husi komisaun organijadora Sekretariu Estadu Joventude e Desportu (SEJD) tarde.

“Hau hanoin laos dehan lakoi selebra, so ke laiha koordenasaun diak entre parte Komite 12 Novembru ho komisaun organijadora (SEJD), tanba aprovasaun proposta ba selebrasaun loron Sebastião Gomes husi komisaun organijadora ne’e tarde demais,”Gregorio Saldanha ba JN-Diário iha ninia knar fatin Balide, Kuarta (04/11) horseik.

Matebian Sebastiao Gomes mate iha loron 28 Outobru tinan 1991 oho husi tropa Indonesia hamuutk ho mauhu iha Igreka motael-Dili.

Nia esplika, komite 12 Novembru harii tiha ona komisaun organijadora, maibe comite labele lao mes-mesak tenki hetan aprovasaun husi SEJD, tanba sira maka iha kompetensia atu desidi no aprova komisaun organijadora.

Depois de ami harii fulan 2 ka 3 foin hetan fali konvite husi Sekretariu Estadu Leovigildo Hornai atu tuur hamutuk hodi haree preparasaun ba komemorasaun mas tempu badak loos.

Nia argumenta mos katak, iha 27 Outubru kalan maka foin hetan resposta husi SEJD maibe tarde ona, entaun kontaktu kolega Amali Marques maka foin hatene missa ba matebian Sebastião halao iha dia 28 Outubru lorokraik.

“Komisaun organijadora la biban atu kontakta hodi halibur malu, maibe realidade hatudu katak familia husi matebian halo missa dader komisaun organijadora halo fali lorokraik,”dehan nia.

Nia dehan, lolos ne’e selebrasaun selebrasaun Sebastião Gomes ho 12 Novembru nian ne’e tenki halo dala ida deit, maibe tinan ida ne’e akontese oin seluk fali.

Nia informa, hanesan prezidente Komite 12 Novembru prefere jardin Motael ne’e tau estatua Sebastião Gomes e propoin mos jardin ne’e tau naran jardin sebastião Gomes.

“Maibe diak liu monumentu iha jardin Motael muda ba fatin seluk hanesan iha Hotel Timor nia oin no ida fali maka iha rotunda CCD Merkadu Lama, tanba fatin rua ne’e huun marsa joven sira halo manifestasaun,” koalia nia.

Nia fundamenta, ho rajaun tanba uluk iha Hotel Timor ne’e joven sira sempre halo manifestasaun kontra Indonesia iha ne’eba no uluk halo manifestasaun 12 Novembru ne’e liu husi rotunda Centro Convencoens Dili (CCD).

Monumentu ne’ebe maka agora dau-dauk iha jardin Motael ne’e laos 12 Novembru nian, tanba Governu rasik esplika katak, monumentu ne’e manifesta deit solidariedade ema TL nian liu husi ajuda malu iha tempu susar ou funu nia laran, maibe tanba figura ne’e foti husi 12 Novembru entaun ema koñese liu figura estatua ne’e hanesan 12 Novembru nian.

Memorial ne’ebe maka Komite 12 Novembru planeia atu halo iha semiteriu Santa Cruz ne’e ita sei halo realijasaun projetu ne’e iha fim tinan 2016 parese ita bele inagura buat ruma iha ne’eba, no orsamentu ba konstrusaun ne’e sei apoiu husi Governu liu husi SEJD. ves

Jornal Nacional