Durante madrugada to’o dader Timor-Leste sente ona rai-nakdoko dala lima

Desde ohin dader madrugada, akontese rai-nakdoko dala lima ona iha Timor-Leste, ikus liu maka ho kilómetru 15 hosi parte kosta enklave Oecussi, maski nune’e to’o oras laiha buat ida maka estraga. 

Rai-nakdoko ne’ebé forte liu maka ho magnitude 6,3, akontese iha parte kosta sul Alor, kilómetru 69 ba parte kosta Timor-Leste no ho profundidade kilómetru sia de’it.

Rai-nakdoko haat ne’e ho magnitude entre grau 4,5 to’o 5,7, tuir programa vijilánsia jeolójika norte-amerikanu nian.

Tuir ajénsia sismolójika indonézia, BMKG, katak laiha alerta ba ‘tsunami’.

Hosi rai-nakdoko ne’ebé akontese dala lima ne’e, maka halo sasan balun monu. Ema sira ne’ebé hela iha Dili, barak maka fó sai informasaun kona-bá rai-nakdoko ne’e iha rede sosiál, hodi hakerek katak sente uma no sasan nakdoko.

Iha fatin balun, ema halai sai hosi sira ninia uma. To’o oras ne’e laiha informasaun kona-ba sasan ne’ebé hetan estragu.

Rai-nakdoko ba dahuluk akontese iha besik tuku 02:00 oras lokál, ohin dader ho magnitude 4,5, no ho kilómetru besik 7,1 ba parte norte Timor-Leste nomós ninia profundidade kilómetru 23.

Daruak akontese iha besik tuku 05:00 oras lokál, millas 70 hosi parte kosta timoroan, ho magnitude grau 4,9 no ida datolu akontese iha zona hanesan, maibé iha fali tuku 06:25 ho magnitude 5,7.

Nakdoko dahaat ho magnitude, (6,3), tuir maka ho 5,3, ba kosta enklave Oecussi kilómetru 15 no ho profundidade kilómetru 46. 

Iha Díli, populasaun hakilar no tuir tradisaun baku sasán sira no sirene sira bombeiru sira toka. Rituál tradisionál ne'e hakarak aviza "sé maka hamosu rai-nakdoko iha rai no nebe hela iha rai okos" katak ema iha rai laran sei moris hela.

To'o agora situasaun iha Díli kontinua kalma.

SAPO TL ho Lusa