FUNDU MINARAI KOMESA TUN…!!!

Jornal Nacional - editorial

Povu timor kala ohin loron nee simu notisia nebe ladun diak konaba fundu minarai ninian nebe iha trimestre anterior US$16.86 bilioens no termina iha 30 Setembru liu ba nee tun ba US$16.44 bilioens.

Fundu minarai timor nian nee tun tamba merkadu nebe mak ladun diak, li-liu presu mina iha mundu tun. Jurus ho kupon intrese sira nebe ita simu $78.63 milloens, mudansa iha merkadu monu makaas $431.78 milloens no movimentu cambais $92.51 milloens, ninia merkadu rasik monu no mos polio retornu trimester 2.61% kompara ho ninia benchmark monu 2.70%.

“kauza husi fundu ne’e negative, iha pontu hira maka hanesan tuir mai ne’e, primeiru global growth kresimentu, krisimentu global ne’e tun I bola tirade iha merkadu Xineza maka’as. Mos ema nia duvidas kona-ba global growth, liu-liu emergent market merkadu não dezenvolvidu sira ne’ebe kontribui maka’as ba global growth tinan sira ikus ne’e”Venancio.

Laiha duvida konaba fundu minarai nee tun tamba presu mina iha mundial tun no mos kursu moeda dolar amerikanu forsa liu halo apresia kontra moeda nasaun seluk nian nebe afeita ba inflasaun global tun hodi labele dudu produsaun.

Nunee mos tasa jursu iha amerika nebe investedor sira espera katak iha Setembro liu ba bele hasae tasa de juru maibe ne’e ses husi espetativa. Maske nunee too ohin loron seidauk iha setreza ida katak atu sae.

Hakarak ka lakohi ekonimia timor nian nee depende liu ba fundu minarai nian. Lei fundo petroliferu nian autoriza governu kada tinan foti 3 porcento fundo minaraio nian ba Orsamentu Jeral Estadu (OJE). Maibe dala balu governu mak ulun fatuk toos hodi hakat liu bareira 3% ho razaun nebe rasional.

Ho fundo minarai nebe menos ona nee, governu obrigado tenki kumpri duni ona lei fundo petroliferu nian, labele foti onsa fundo minarai liu porsentu 3, se lae fundo minarai nee hotu iha tinan hirak mai oin, jersaun tuir mai sei la goza fundo minarai nee.

Nunee mos governu tenki halo ona poupansa ba desepezas estadu nian no mos governu tenki buka dalan rendementu alternativa, li-liu non petroliferu atu nunee loron ruma fundo minarai nee hotu mos, governu iha rendementu atu bele kontinua subervive estadu ida nee, se lae nasaun bele mate.

Atu nasaun nee subrevive, nee presisa kontribuisaun sidadaun ida idak nian, li-liu taxas, selu bee no eletrisidade. Sidadaun nebe diak los hanoin atu uza deit maibe oinsa bele fo kontribuisaun ba desenvolvimentu ida nee, liu husi dever taxa ninian no mos fasilidade nebe governu prepara ona, bee no eletrisidade tenki selu.

Rendementu non petroliferu sira nebe bele ajuda desenvolvimentu nasaun nee wainhira mina iha tasi timor maran ona, laiha tan ona fundo minarai hodi injecta ba orsamentu Jeral Estadu hodi governu uza ba desenvolvimentu nasaun nian. *