Demonstrasaun Koruptu Tempu

Tri Dharma (pilár tolu) Universidade dehan, universidade nu’udar fatin estuda, peskiza no asaun sosiál. Dala barak ona estudante sira la uza universidade tuir filozofia universidade ne’ebé temi ona iha leten. Maibé, sira uza universidade hodi kontra polítika estadu ne’ebé la loos.

Hanesan oras ne’e akontese iha Kampus Sentrál Universidade Nasionál Timor-Lorosa’e (UNTL), estudante sira hosi universidade oi-oin iha Díli liu-hosi grupu ida naran Movimentu Universitáriu Timor-Leste (MUTL) halo asaun pasífiku hodi kontra Lei Pensaun Vitalísia ne’ebé ho tendénsia habokur de’it eis titulár sira.

Asaun hirak ne’e pozitivu tanba estudante sira hakarak halo alterasaun ba Lei Pensaun Vitalísia ne’ebé hatodan orsamentu jerál estadu no kria dezigualdade iha Timor-Leste. Maske nune’e, iha mós parte negativu tanba asaun ne’e disturba estudante sira seluk nia aprendizajen. Estudante sira seluk labele simu aula ho di’ak tanba barullu.

Sira ne’ebé halo manifestasaun ne’e mós lakon ona siénsia no aula lubuk ida ona. Tanba, besik fulan ida ona sira konsentra de’it ba manifestasaun no pásivu iha prosesu aprendizajen. Hanesan estudante, iha obrigasaun atu estuda ka eskola. Kuandu lor-loron okupadu de’it ba demonstrasaun, bele mosu implikasaun negativu ba án rasik no nasaun. Ba án rasik tanba estudante sira la aproveita inan-aman sira nia sakrifísiu ne’ebé buka osan ba sira atu eskola. Ba nasaun tanba nasaun sei la produs rekursu umanu ne’ebé kualidade tanba mínimu koñesementu.

Estudante ne’ebé di’ak, tenki estuda maka’as, kria diskusaun grupu hodi fahe matenek nune’e sai alternativu ba ema ruma ne’ebé jere sasán públiku la loos. Demonstrasaun la’os sasukat ba kualidade rekursu umanu. Demonstrasaun nu’udar korupsaun ne’ebé sei destroi ka nauk estudante sira nia tempu ba estuda.

Tanba ne’e, tenki iha limitasaun ba demonstrasaun para fó biban ba estudante sira atu estuda. Solusaun ba Lei Pensaun Vitalísia maka haruka karta petisaun ba órgaun soberania hotu-hotu atu estuda no tetu. Solusaun seluk; kria debate públiku iha kampus ka iha mídia nune’e bele forma opiniaun públiku para bele altera lalais Lei Pensaun Vitalísia. (*)

Matadalan