Koruptor Sei La Hetan Indultu

Membru Parlamentu Nasional konsege aprova ona lei numeru 30/III/III kona ba prosedementu indultu hodi limita kompetensia Prezidente Republika Demokratika de Timor-Leste (RDTL), atu labele fo indultu ba koruptor sira.

Tuir Vise Presidente Komisaun A (constitucionais, justisa, administracao publika, poder local, a anti korupsaun) Arao Noe, dehan durante ne’e prezidente uza duni kompetensia fo indultu, maibe laiha lei ida mak define see loos mak merese atu hetan indultu.

“Iha artigu terseiru alinea A iha lei ne’e, hatuur katak ema sira ne’ebe mak komete krimi korupsaun, trafiku humanu, droga, no krimi kontra estadu, ne’e labele hetan indultu,” Deputadu Noe esplika, iha Parlamentu Nasional.

Mesmu kriminozu sira ne’e hatudu komportamentu diak durante iha prizaun, maibe nia dehan,  labele  hetan indultu e ida ne’e la viola direitus humanu.

Nia dehan, lei ne’e hanesan baze legal ba xefe estadu bainhira atu fo indultu ba prizioneiru sira tenke bazea ba proposta governu, proposta governu mos labele mensiona naran husi prizioneiru ne’ebe komete krimi hirak ne’e.

“Sira tenke kumpri prizaun ne’e kompleto, ne’e ita la viola direitus humanu,” nia hateten.

Iha parte seluk Membru Parlamentu Nasional, Deputadu Osorio Florindo, konkorda tanba atu minimize korupsaun tenke implementa duni asaun hirak hanesan ne’e.

“Korupsaun ne’e attitude ne’ebe ladiak, ita tenke halo hanesan ne’e hodi fo hanoin ba sira ne’ebe kaer kargu xefia sira ne’e tenke kuidadu aan no tauk atu labele involve iha aktu korupsaun ne’e,” nia hateten.

Nia dehan, lei ne’e halo hanesan parte ida hosi prevensaun ba aktu korupsaun labele buras iha tempu future mai.

“Diak liu ita prevene agora, la’os grave ona mak ita foin buka dalan atu prevene, ne’e ladun diak,” nia dehan.

Iha fatin seluk komunidade Caetano Carvalho, apresia ho kriasaun lei ida ne’e, koruptor labele hetan indultu tanba hahalok ne’ebe sira halo ne’e hamoe estadu no halo povu terus.

“Povu ne’ebe kiak, kiak ba bebeik,” nia dehan.

The Dili Weekly