Alegasaun final sira iha julgamentu eis-ministra timoroan sira sei akontese iha Setembru

Alegasaun ikus sira hosi defeza no hosi Ministériu Públiku iha julgamentu ba eis-ministra timoroan na'in rua ne'ebé akuzadu iha partisipasaun iha negósiu no administrasaun prejudisial, bele akontese de'it hafoin fulan-Setembru, haktuir hosi fonte judisial sira.

Eis-ministra Finansa Emília Pires ho eis-visi-ministra Saúde Madalena Hanjam hetan akuzasaun tanba iregularidade sira bainhira sosa kama hospital atus resin iha kontratu sira ne'ebé hatutan ba empreza hosi eis-ministra nia laen nian ho konspirasaun entre sira na'in tolu ba konkretizasaun negósiu nian iha folin dolár rihun 800.

Julgamentu, ne'ebé hala'o hahú hosi fulan-Outubru, ohin iha tan audénsia ida maski la rona sasin ida ne'ebé previstu iha kazu ba matenek-na'in ida ne'ebé nomeadu hosi Ministériu Públiku ho juís marka sesaun foun ba loron 28 fulan-Juñu.

Iha faze ikus hosi julgamentu sei konsidera relatóriu sira ne'ebé husu ona ba matenel-na'in sira ne'ebé nomeadu hosi Ministériu Públiku no hosi Defeza hodi analiza folin sira hosi kama ospital nian, ne'ebé sosa iha tinan 2011 no 2012, nia komparasaun ho folin sira iha merkadu iha tempu ne'ebá no aspetu sira seluk.

Ministériu Públiku husu ona análize hosi Polísia Sientífiku ba Investigasaun Kriminal (PCIC) ne'ebé nomeia ona elementu na'in ida, Níveo Alberto, hodi hala'o análize, no Defeza nomeia ona espesialista australianu ida iha aprovizionamentu.

Matenek-na'in sira tenki entrega sira nia relatóriu ba Tribunal to'o loron 20 Marsu liubá no Ministériu Públiku husu ona dala rua hodi aumenta prazu, husu hodi hamenus extensaun ba investigasaun nian, haktuir hosi fonte judisial sira ba Lusa.

Hafoin entrega tiha relatóriu rua ba Tribunal maka marka ona ba loron-sesta ne'e asaun ida ba prestasaun hosi depoimentu matenek-na'in sira ne'ebé la akontese tanba polémika relasionadu ho relatóriu hosi PCIC.

Defeza aprezenta ona rekerimentu ida hodi hatete kona-ba iregularidade kona-bá relatóriu hosi PCIC ne'ebé la'ós hatán de'it ba pergunta sira ne'ebé husu hosi Tribunal maibé asina hosi ema na'in haat no la'ós asina de'ti hosi matenek-na'in ida ne'ebé nomeadu.

Iha alternativu Ministériu Públiku oferese ona aprezenta relatóriu hanesan maibé asina de'it hosi Níveo Alberto, asaun ne'ebé hetan ona protestu hosi Defeza tanba konsidera katak ne'e hanesan iregularidade ida.

Juís lasimu rekerimentu hosi defeza, hodi aseita relatóriu dahuluk hosi PCIC nune'e la presiza versaun foun ho falta asinatura ida ne'ebé nia aprezentasaun sai indeferidu mós.

Previzaun maka matenek-na'in hosi Ministériu Públiku sei rona iha loron 28 fulan-Juñu no hosi defeza iha loron 27 fulan-Jullu ne'ebé bele sai hanesan faze ikus sira hosi prosesu sira julgamentu antes hosi alegasaun ikus sira.

SAPO TL ho Lusa