FOLIN KAFÉ 0,33 CENTAVOS NE’E TOLOK ESTADU

Prezidenti Repúblika (PR), Taur Matan Ruak hateten katak, kafé Timor Leste (TL) nia folin agora dada’uk ne’e, tolok Estadu TL, tanba kafé nia folin ne’e 0,33 centavos de’it.

“Iha Ermera sira dehan, di’ak liu kafé ne’e Governu mak sosa, tanba malae mak sosa ne’e, sira tolok fali ita, sira tolok ita nia abon, ita nia inan aman ita nia Estadu mos sira tolok lakon, tanba kafé nia folin ne’e, 0,33 centavos de’it,” dehan Taur Matan Ruak bainhira dialogu ho komunidade iha Suku Lahae, Postu Administrativu Aileu Villa, Munisípiu Aileu, Segunda (18/07).

Taur Matan Ruak haktuir, kafé Timor nia folin iha, maibé kafé na’in mak seida’uk hatene mekanismu di’ak ba sira nia kafé.

“Tanba ita adopta merkadu livre, ida ne’e problema ida ne’ebé aban bainrua presiza hadia, tanba kafé iha nasaun seluk ne’e, folin maka’as,” katak Taur Matan Ruak.

Xefi Estadu ne’e esklarese lia hirak ne’e, hodi responde ba preokupasaun komunidade Hermegildo Mesquita nian kona-ba kafé nia folin ne’ebé tinan ba tinan nafatin de’it.

“Ami hakarak atu husu ba Prezidenti Repúblika Taur Matan Ruak katak, Governu tenki hasa’e folin kafé nian,” katak Hermenegildo.

Nia mós husu ba Governu atu halo irigasaun ba sira iha Suku refere, tanba iha Suku Lahae ne’e, iha natar barak, i nia mós ejiji ba Governu atu ajuda trator ba povu agrikultor sira iha Suku refere.

Alénde ne’e, nia mós informa ba PR Taur Matan Ruak katak, ema kbi’it laek iha Suku refere barak, maibé seida’uk hetan atensaun husi Governu.

“Ami husu ba Governu ne’ebé dehan katak, atu halo uma ba ki’ak sira, maibé iha Suku ida ne’e laiha. Ami iha Suku ida ne’e, ferik ho katuas barak liu mak seida’uk hetan osan terseira idade,” relata nia.

Hatan kona-ba uma ba ki’ak sira ne’e, PR Taur Matan Ruak dehan, uluk Governu hahú ho uma lima ba Aldeia ida, maibé to’o ikus Governu muda fali ba uma MDG.

“Uma MDG iha fatin barak, povu soe tiha, tanba kualidade laiha, iha maibé iha fatin balun ema uza,” katak Taur Matan Ruak.cos

Jornal Nacional