Tinan oin, reforma veteranus ativu iha F-FDTL

DILI - Xefe Estadu Maiór Jenerál F-FDTL, Maijór Jenerál Lere Anan Timur fó sai katak, tinan oin sei iha reforma ba veteranus ativu iha forsa armada,

Jeneral Lere dehan, oras ne’e veteranus ativu iha F-FDTL balun atinji ona tinan 50 resin besik 60 ona, tanba ne’e maka tinan oin, karik iha nesesidade sei iha tan reforma.

“Ami sira ne’ebé maka sei ativu ne’e maioria ami nia tinan atinji ona ba 50 resin besik 60 ona, se iha nesesidade tinan oin sei iha tan reforma,” dehan Lere ba jornalista sira iha Kuartel Jenerál F-FDTL, Fatuhada, Tersa (12/7).

Nia hatutan, sira ne’ebé maka tama ba idade reforma sei reforma maibé ba nia ne’e desizaun polítika, ofisiais seluk ne’e tuir idade tinan 60 ba reforma.

Nune’e mós jovens sira ne’ebé maka seidauk atinji tinan 60, maibé sira nia estadu fíziku labele ona pasa ba rezerva tinan to’o ba reforma.

“Desijaun polítika ita hein, desizaun reforma ne’e ema tenki sai ho dignidade ho onra no orgullu nu’udar libertadór ba nasaun ida ne’e,” dehan Lere.

Jenerál Lere husu ba veteranus reformadu sira, karik mete ona ba vida polítika tenki ko’alia sukat ibun ba partidu seluk, nune’e para ema seluk labele kondena.

Antes ne’e, Governu liu hosi Ministériu Defeza (MD) fó subsídiu ba veteranu reformadu FALINTIL-Forsa Defeza Timor Leste (F-FDTL) hamutuk na’in 27 kada ema ida ho valor orsamentu rihun $ 15.000.

Ministru Defeza, Cirilo Cristovão dehan, orsamentu ne’e bolu orsamentu reintegrasaun anual tinan 2017 hanesan subsídiu governu tau dala ida de’it ba veteranu reforma sira ne’e, kada ema ida hetan rihun $ 15.000.

“Ita bolu subsídiu reintegrasaun ba ita nia veteranu sira ne’ebé maka tama ona ba reforma hamutuk na’in 27, ema ida rihun $15.000 simu dala ida de’it,” dehan Cirilo ba jornalista sira iha Kuartel Jenerál F-FDTL, Fatuhada, Segunda (11/7).

Nia husu ba veteranu sira ne’e atu uza osan subsídiu ne’e hodi halo investimentu ba oan sira nia eskola, tanba nasaun ne’e atu hetan respeita hosi nasaun seluk presiza ema matenek.

“Ha’u husu atu ita bo’ot sira uza osan ne’e hodi halo investimentu ba oan sira nia eskola labele uza fali ba buat seluk, tanba atu dezenvolve nasaun ne’e presiza ema matenek,” Cirilo husu.

Iha fatin hanesan Xefi Estadu Maiór Jenerál F-FDTL, Maijór Jenerál Lere Anan Timor husu mós ba veteranu sira ne’e atu kuida sira nia saúde no sai ejemplar domin nian iha komunidade sira nia leet.

“Ha’u husu imi atu kuidadu imi nia saúde didi’ak no kuida imi nia família, tanba imi katuas ona, imi nia kontribuisaun ba nasaun bo’ot tebes agora imi nia responsabilidade bo’ot ba imi nia família,” dehan Lere.

Nia hatutan, karik veteranu sira ne’e maka hakarak atu mete partidu polítiku karik ko’alia sukat ibun, sé lae ema seluk bele kondena fali sira.

Entertantu, reprejentante Veteranu reformadu Afonso de Jesus “Sanis” dehan, maske reforma ona hosi military, maibé sira kontinua kumpri orden hosi sira nia komandante.

“Ami firme nafatin ba orden ami nia komandante sira nian, no ami sei uza osan ne’e ba ami nia oan sira nia eskola,” dehan Sanis.(way)

Timor Post