Tribunal simu karta hosi parlamentu, kona ba eis prezidente parlamentu Vicente Guterres

DILI - Tribunál Distritál Dili (TDD), simu tiha ona karta hosi meza Parlamentu Nasional (PN) kona-ba arguidu Vicente Guterres la’ós ona Prezidente Parlamentu Nasionál.

Tuir inforasaun ne’ebé Timor Post asesu, hosi seksual kriminál  Tribunál Distritál Dili katak, Tersa (12/07),  hafoin simu karta hosi PN, Tribunál haruk kedas ba Ministériu Públiku verifika no halo pronunsia Karta ne’e Tribunál haruka ona Ministériu Públiku halo pronunsia hodi kontinua prosesu kazu Vicente Guterres iha Tribunal.

Agora desizaun tomak iha Ministériu Públiku, bainhira MP halo ona pronunisa ba karta demisaun hosi PN. MP sei haruka  karta refere ba tribunal hodi kontinua prosesu.

Karik MP la pronunsia, prosesu ba kazu korupsaun ho abuzu poder, partisipasaun ekonomia de negosio ne’e,  sei kontinua demora.

“Tribunál haruka karta hosi Parlamentu Nasionál ba  Ministériu Públiku, hein Ministériu Públiku resposta, posebilidade sei lori tempu oituan,” haktuir fonte konfirmadu  ba Timor Post iha Tribunál, Tersa  (12/07).

Fonte ne’e esplika, tuir esprensia durante ne’e, prosesu hanesan ne’ebé Tribunál haruka ba Ministériu Públiku, Ministériu Públiku  sempre halo pronunsia, depois karta pronunisa ne’e, Ministériu Públiku haruka fila ba Tribunal, nune’e hodi kontinua prosesu ba oin.

Enkuntu antes ne’e, Diretór JSMP, Luis Oliveira Sampaio subliña,  ho meja parlamentu Nasionál foun, presiza duni tribunál hala’o karta notifikasaun foun ba Parlamentu Nasionál  hodi husu,  PN hasai imunidade eis Prezidente Parlamentu Nasionál  Vicente Guterres hodi tuir prosesu julgamentu.

Tuir nia, bainhira atu hahu julgamenntu ba arguidu Vicente Guterres, inisitiva halo karta notifikasaun tenke mai hosi Tribunál, tanba polítika  sira sei la halo buat ruma, tanba karta antes  Tribunál haruka ba meja parlamentu Nasionál prazu liu ona.

“Agora ho polítika  meja parlamentu Nasionál foun, bele iha mudança, agora meja PN haré fali karta notifikasaun antes,   hanoin sira la haré ona. Tan ne’e,  meus maka tribunál tenke halo notifikasaun foun, junta ho ajenda foun. JSMP haré meja PN foun sei iha vontade hodi  hasai desizaun liu plenaria hasai imunidade arguidu Vicente Guterre mai tuir nia prosesum ba kazu ne’ebé nia infrenta,” Katak Diretór JSMP ba diáriu   ne’e iha Kolmera Dili (1/06). (max)

Timor Post