MP: PNTL Presiza Utiliza INTERPOL

Membru Parlamentu Paul Moniz husu ba Polisia Nasional Timor Leste (PNTL) atu utiliza international police hodi buka tuir dadur nain rua ne’ebe halai lakon durante tinan tolu ona, maibe to’o agora seidauk kaptura.

Nia dehan, sei iha rezultadu identifikasaun hatudu dadur nain rua ne’e laiha iha Timor, entaun PNTL presiza halo aprosimasaun ne’ebe rigorozu ho Interpol (Internasional Police) atu ajuda buka tuir dadur nain rua ne’e.

“Sira nia seriadade mak sei menus, ladun efetivu, sira bele koalia ho Interpol hodi buka tuir dadur nain rua ne’e,” nia hateten.

Maibe, nia dehan karik dadur nain rua ne’e iha hela rai laran, entaun ida ne’e obrigasaun polisia nian tenke buka tuir to’o hetan, tanba Timor ne’e rai ki’ik ida.

“Polisia tenke buka ho didiak, tanba ita nian nasaun ne’e la’os rai luan ida,” nia hateten.

Dadur nain rua ne’e (Juga Gama no Agostino Salsinha) halai sai husi prizaun Becora hamutuk ho dadur 24 seluk iha tinan 2013, enkuantu nain 22 kaptura tiha ona.

Entretantu dadur Agustino Salsinha tama prizaun tanba komete krimi omesidu grave, enkuantu Juga Gama komete iha krime espalha droga iha rai laran.

Iha parte seluk Diretor Asosiasaun Direitus Humanus (HAK), Manuel Monteiro, hateten polisia iha duni seriadade atu buka tuir dadur nain rua ne’e, maibe iha difikuldade barak mak sira infrenta.

“Rekursu limitadu, unidade servisu investigasuan kriminal ne’e ema nain 6 deit, fasilidade laiha, kompara ho polisia iha Atambua- Indonesia ema nain 100 mak servisu iha unidade SIK nian,” nia hateten.

Difikuldade seluk mos mak, nia dehan to’o agora Timor seidauk iha baze legal ida karik ema komete krimi ruma iha Timor no halai ba iha pais vizinhu, depois haruka mai tuir julgamentu iha rai laran. 

Tanba ne’e , nia dehan sekarik dadur nain rua ne’e iha hela pais vizinhu, PNTL presiza halo akordaun ne’ebe diak no konkreta atu bele haforsa pais vizinhu sira hodi buka tuir dadur nain rua ne’e.

Hatan ba preokupasaun ne’e Segundu Komandante, Komisariu Faustino da Costa, hateten foin lalais sira delega ona xefe Servisu Investigasaun Kriminal (SIK) atu halo enkontru ho xefe polisia Atambua-Indonesia atu diskuti kona ba asuntu ne’e.

“Husi parte Indonesia sei ajuda ita hodi aktualiza ba ita,” Komisariu Costa hateten.

Nia informa, dadur nain rua ne’e agora dadaun la’os iha Timor, tanba ne’e mak agora dadaun PNTL sei buka maneira oin-oin atu bele kaer sira.

The Dili Weekly