DILI, STLTIMORLESTE.com – Natal neebe kada tinan sarani sira selebra hodi refleta hametin ema nia peregrinasaun fiar hasoru Jesus Kristu nuudar Maromak Oan neebe inkarnadu moris iha ema nia leet.
Padre Richardo Pasang, SVD ba STL liu husi WA, Kuarta (25/12/2024) hatete, selebrasaun Natal Naroman liu rai dame neebe halo aan ba mane.
“Natal neebe ita selebra husu ita atu reflete hodi hametin liu tan ita nia peregrinasaun fiar atu hasoru Jesus Kristu no konverte Nia nuudar Oan Maromak neebe inkarnadu-moris iha ita leet. Hanesan hori uluk kedas hateten, Maromak koalia ho ita bei-ala sira uluk uluk hodi profeta sira, iha tempu ikus koalia ho ita hodi Nia Oan Mane, Nia foti nuudar sasan tomak nia nain,” dehan Padre Richardo.
Tan nee, selebra Natal katak ema halo hetan misteriu foun iha nia peregrinasaun fiar ba Maromak. Misteriu Maromak halo aan ba ema Evangelista Joaun hakerek Liafuan nee halo tiha aan ba Mane, Nia moris duni ho ita Liafuan iha nanis.
Liafuan nee mak Maromak nanis. Maromak halo sasan hotu hodi Nia, Nia mak moris Nain, Moris nee mak nia naroman, Naroman nabilan hela iha nakukun laran, Naroman moris iha ema nia leet, liu husi liafuan hirak nee, bele dehan katak ema importante tebes iha Maromak nia fuan. Iha Maromak nia oin, ema folin boot tebes.
“Tanba nee, akontesimentu Jesus Kristu halo aan ba ema, Jesus nia moris espresa no hatudu mai ita katak Maromak besik ho ita, Maromak sai amigu ho ita, Maromak uniaun ho ita nuudar Nia kriasaun glorioso tuir Nia ilas. Grande Deus Maromak Boot nee sai Maromak neebe besik ho ita, sai Maromak neebe intima ho ita no solider ho ita. Maromak laos deit moris iha ita leet, maibe Nia sai ema lo-loos no nakloke-aan, hadomi, moris no mate ba ita hotu. Maromak bolu ita liu husi Nia Oan Mane mesak Jesus Kristu, Kosok Oan neebe moris ho ita. Nia Emanuel Maromak ho ita, ho nunee liu husi Nia moris ita hetan esperansa foun, esperansa ba ksolok moris no salvasaun iha no hamutuk ho Nia. Nia mak Naroman verdadeiru neebe mai iha mundu rai klaran,” dehan Pe.
Padre dehan, Profeta Izaias fo hanoin no haklaken mensajen ksolok ba ema neebe lakon esperansa, katak ema Nia Maromak mak Liurai neebe mai fali, moris iha ema leet. Tan nee, haksolok ba, hahi no hawelok hamutuk hodi hahi Maromak nia gloria. Tanba Maromak fo ona konsolasaun, fo ksolok nia povu.
“Maromak hatudu ona mai ita Nia liman santu atu salva ema no mundu tomak. Maromak mai no hola parte iha ita nia terus no ksolok moris liu husi Nia Oan Mane, Jesus Kristu. Natal Kristu transforma no renova ita nia fiar moris, hamoris ita nia domin no esperansa nuudar oan naroman Maromak nian, tanba Naroman Liurai Dame moris ona iha ita leet, halakon nakukun husi ita nia moris. Mai ita hotu moris nafatin iha naroman Kristu nian nuudar Liurai dame,” katak nia.
PE dehan, Nia mak Liafuan Ksolok neebe halo-aan ba ema no moris iha ema leet. Husi Nia moris, halo ema sai bensaun ba maluk sira no ba mundu ema hotu sai kanal de grasa ba maluk sira no ba sosiedade.
“Boas Festa Natal ba ita hotu Emanuel Maromak ho ita,” nia hakotu.
(eme) - Suara Timor Lorosae(STL)
Sem comentários:
Enviar um comentário