ISABEL FERREIRA: FAMILIA FÓ IMPAKTU POZITIVU BA NASAUN

Primeira Dama, Isabel Ferreira esplika katak, familia nu’udar embriu ki’ikoan ida iha sosiedade nia laran, no sé grupu ne’e la’o di’ak ona, entaun bele fó impaktu di’ak no pozitivu ba nasaun.

“Foin dadauk ami halo aktividade talk show ida konaba familia forte nasaun forte, ita nia haoin hakarak halo bebeik atividades ida ne’e, i hakarak mós halo kampaiña sensibilizasaun ba Timoroan tomak. Husi relijiaun ne’ebé de’it ema hatene katak, familia mak hanesan embriu ki’ik oan ida iha sosiedade nia leet. Se karik grupu ki’ik oan ne’e la’o di’ak ona, moris iha dame, domin, lialos no paz iha mundu nia laran, bele fó impaktu pozitivu ba iha sosiedade no mós ba nasaun,” esplika Primeira Dama, Isabel Ferreira ba JN-Diário (04/10), iha Paço Episcopal Lecidere-Díli, wainhira hala’o vizita kortézia ba fatin refere hodi koalia konaba programa ‘familia forte nasaun forte ho parte igreja nian.

Isabel Ferreira hatutan katak, programa familia forte nasaun forte ne’e tinan-tinan sempre hala’o iha munisípiu tolu mak hanesan Díli, Baucau no Bobonaro. No fó mós sertifikadu ba inan sira ne’ebé selebra loron Bodas de Prata no Bodas de Ouro, no ba oin sei hala’o nafatin kampañia de sensibilizasaun ba Timoroan tomak hodi hatene konaba programa ne’e, no husi relijiaun ne’ebé de’it hatene katak, familia mak membru kiikoan ida iha sosiedade nia leet.

Nia hateten katak, parte igreja nian em prinsípiu fó apoiu tomak ba programa ne’e, tamba foin dadauk halo tiha ona iha Díli iha dia 15 fulan Maiu, Baucau hala’o iha fulan Jullu no Maliana hala’o iha Agustu. I ida ne’e hanesan mós papel igreja nian hodi prepara sarani sira atu bele moris iha família ne’ebé paz, domin no hakmatek atu nune’e bele banati tuir hanesan família Nazare nian.

“Iha tinan ida ne’e ita halo semináriu tolu husi Díli, Baucau no Maliana, no atividade talk show depende ba programa televizaun nian, hanesan programa ita nia bainaka wainhira iha tempu livre mak ami foin priense. Munisípiu seluk ami seidauk hala’o atividade ida ne’e tamba ita sei hala’o tuir Diocese,” Isabel Ferreira afirma.

Nia dehan tan katak, atividades semináriu ne’e normalmente hala’o la ho kustu ne’ebé bo’ot, tamba realiza ho tempu badak no sei la fó implikasaun ba finanseira, no wainhira aktividade ne’e remata sei entrega sertifikadu ba sira ne’ebé tuir semináriu ne’e no sertifikadu ne’e rasik sei asina husi Prezidenti da Repúblika.ías/mj3 

Jornal Nacional