PR TAUR VIZITA ONA SUKU HOTU IHA MUNISÍPIU 8

Prezidenti Repúblika (PR) Taur Matan Ruak, vizita ona Suku lubuk ida iha Munisípiu 8 hanesan, Ainaro, Ermera, Covalima, Manufahi, Manatuto, Aileu, Bobonaro no Oe-Cusse.

Tuir promesa ne’ebé Xefi Estadu ne’e halo ba nia-an rasik katak, durante nia mandatu hanesan Prezidenti Repúblika katak, nia hakarak   vizita hotu suku 442 iha Timor laran tomak.

Agora dadauk sei hela Suku 6 iha Munisipiu Lospalos mak Xefi Estadu ne’e seida’uk vizita, Suku ida iha Viqueque, Suku ida iha Baucau, no Liquiça, inklui Suku balun iha Díli laran.

Xefi Estadu la sente kolen, hakur mota, tun-sa’e foho, toba iha anin no udan laran, tanba deit hadomi povu hodi lori povu ba moris di’ak.

Durante vizita Xefi Estadu nian ba Suku hotu iha Timor laran tomak, nia husu ba povu atu serbisu hamutuk, hodi luta kontra kiak no mukit, tanba Timor Leste hetan ona independensia, maibé moris diak seidauk hetan.

“Ha’u mai tuku imi nia odamatan dala ida tan, husu imi atu ita la’o hamutuk ba buka moris diak. Ha’u mós mai fó obrigadu ba imi, ba terus no susar imi sofre  iha funu laran, tanba imi mak ami moris, no tanba imi mak nasaun moris, imi mak heroi nasaun ida nee nian,”hateten PR Taur Matan Ruak, bainhira dialogu ho povu iha Suku-Suku iha Timor laran tomak.

Taur Matan Ruak dehan, bainhira buka moris diak, povu tenki kuidadu saúde, haruka oan sira ba eskola, hadia ekonomia uma laran, no serbisu hamutuk ho autoridade lokal sira hodi atinji objetivu ne’ebé povu TL mehi.

Maske programa ne’e diak, tanba povu mós kontenti tebes ho vizita Xefi Estadu ne’e nian, maibé sei mosu kritika oi-oin husi parte lider polítika balun, tanba la konsideira esforsu ne’ebé Prezidenti Repúblika nian ne’e hodi heree rasik kondisaun no situasaun ril povu TL nian, li-liu iha Suku sira ne’ebé mak la asesu ba dezenvolvimentu. Maibe politika nain sira nia hanoin ne’e, kontráriu ho situasaun povu nian, tanba povu kontinua ejiji ba Xefi Etadu ne’e atu kontinua vizita sira iha área rural kada fulan.

Povu mós ejize ba ukun nain sira seluk, atu la bele tu’ur deit iha ace laran, hodi hatene kritika de’it ema seluk, maibé tenki la’o hanesan Xefi Estadu ne’e, hodi haree direitamente kondisaun moris povu nian iha área rural.

Iha vizita ne’e mós, povu halerik ho mataben ba PR Taur Matan Ruak, tanba TL ukun aan tinan 14, maibé sira seidauk senti benefisiu husi ukun aan ida ne’e, no durante ne’e, ukun nain ida nunka hakbesik aan ba sira hodi rona sira nia halereik.

Alende ne’e, povu iha área rural mós louba tebes PR Taur Matan Ruak hodi dehan, iha mundu ne’e, Prezidenti Repúblika povu  so haree de’it nia klamar husi televisaun, maibé Prezidente Timor Leste nian oin seluk, tu’un direitamente ba povu iha área rural, hodi haree kondisaun moris povu nian.

 “Ami louba ho ami nia Prezidenti, tanba Prezidenti ida ne’e mak úniku hadomi duni povu ida ne’e, tanba nia mai husi povu no fila ba povu. Tanba ne’e ohin loron ami kontenti simu ami nia Prezidenti, maibé ami hato’o mós sentimentu tristi ho mataben ba ami nia Prezidenti kona-ba ami nia susar no terus ne’ebé ami infrenta durante ne’e,”hateten Frederico de Araújo husi Suku Maununu, Munisipiu Ainaro.

Nun’ee mós komunidade  Moises da Costa husi Suku Holarua dehan, sira tanis ba Prezidenti Repúblika, tanba tempu Portuguese niaan, foin primeiraves Prezidenti vizita sira nia Suku.

Nia hatutan, durante ne’e, sira tanis ba dezevolvimentu, tanba sira haree dezenvolvimentu ne’e la’o de’it iha nasionál.cos

Jornal Nacional