DESKONFIA KOMETE KRIME ANGARIASAUN FUNDU BA CNRT • TRIBUNAL NOTIFIKA KALBUADI

Tribunal Distrital Dili (TDD) notifika ona Francisco Kalbuadi Lay, atual Ministru Turismu, Arte no Kultura kona-ba iregularidade balun ne’ebé deskonfia komete krime iha prosesu angariasaun fundu ba partidu CNRT iha tinan 2012.

Ho notifikasaun TDD nian ne’e, Kuarta (5/10/2016), Francisco Kalbuadi Lay, ne’ebé akompanhia husi nia advogadu Fernando Carvalho, hakat ba Parlamentu Nasional (PN) komisaun G hodi presta deklarasaun atu submete ba levantamentu imunidade.

Ministru Francisco Kalbuadi Lay to’o iha edefisiu PN ho kareta Estado numeru matrikula 12 G, tuku 09:00  dader Otl, depois hasoru malu kedas ho Prizidente Komisaun G, atual deputado bankada CNRT, Agostinho Lay ho membru komisaun G nian balun.

Iha audensia ne’e partisipa mos ho Prezidente Komisaun A, trata asuntu lei, administrasaun publika, justisa, poder local no anti korupsaun, deputada Carmelita Caetano Moniz.

Hafoin audensia, Jornalista sira  ne’ebé mak hein hela Ministru Francisco Kalbuadi Lay, atu halo entrevista, maibe Ministru rasik rezeita atu fo informasaun, maske jornalista sira nafatin hakbesik ba nia.

“Hau lakohi koalia,” hateten Ministru Kalbuadi Lay ho oin hamanasa no hakat ba sae kareta ne’ebé akompanha ho nia eskoltu sira.  Prezidenti Komisaun G, Agostinho Lay, esklerese katak, komisaun G simu karta husi Tribunal Distrital Dili atu halo levantamentu imunidade ba Ministru Francisco  Kalbuadi Lay.

“Komisaun G halo audensia ho ministru Turismu, tuir notifikasaun ne’ebé tribunal haruka mai ami atu halo suspensaun kargu ba Ministru Kalbuadi, tanba akuza ministru komete aktu kriminal ida iha tinan 2012, kona ba agariasaun fundu ba partidu CNRT. Infleismente, hau ladun hatene diak se bele husu iha tribunal,” dehan Prezidente komisaun G, Agostinho Lay.

Deputado CNRT ne’e hatutan, komisaun G halo prosesu normal tuir notifikasaun ne’ebe tribunal haruka, ne’ebé Komisaun halo audensia ho Ministru Turismu ho ninia defensoria para heta informasaun faktus ruma bazeia ba notifikasaun ne’ebé iha.

“Atu halo levantamentu imunidade ne’e tenke rona mos husi ministru, tribunal hateten katak arguidu ne’ebé ami rona informasaun ami haruka karta ba Ministru hodi mai halo audensia, komisaun nia kompetensia halo pareser, atu foti desizaun iha plenaria,” esplika Agostinho Lay.

Agostinho dehan, karta notifikasaun tribunal haruka ba komisaun G iha semana kotuk, ne’ebé iha tempu badak komisaun sei hato’o relatorio pareser ba meja PN hodi halo lavantamentu imunidade.

Tuir informasaun ne’ebé JN-Diário hetan katak, kazu ne’e Comissão Nacional das Eleições mak ba hato’o keixa.mia

Jornal Nacional