Atendementu Saude Iha Klinika Privadu Diak Liu Publiku

Tuir observasaun husi Membru Parlamentu (MP) Nasional durante ne’e, nota katak atendementu saude iha klinika privadu ba komunidades kualidade liu duke iha fasilidade publiku, tanba sira iha ekipamentus ne’ebe kompletu.

MP Virgilio da Costa Hornai, hateten iha klinika privadu pasiente hetan atendementu lalais no kompletu liu –liu diagnostiku, enkuantu iha publiku laiha.

“Klinika privadu fo atendementu ne’ebe mais kualidade, sira garantia prestasaun ba ema, maibe ita nia fasilidade publiku sira ne’e ekipamentus limitadu,” nia kompara.

“Rekursu humanu ita destaka hotu ona, maibe servisu la honestidade hanesan sira halo iha klinika ne’ebe sira pratika ba.”

Nia preokupa ho situasaun ida ne’e, tanba medikus barak liu hatudu sira nia atendementu diak iha klinika privadu ne’ebe sira pratika ba kompara ho atende ema ki’ik sira iha fasilidade publiku. 

Iha konstituisaun RDTL artigu 57, hateten ona katak ema hotu iha direitu atu hetan atendementu saude ne’ebe kualidade ho gratuita, maibe realidade atendementu kualidade ba ema ne’ebe iha osan, la’os ba povu ki’ik sira. 

Iha parte seluk Diretor Jeral Prestasaun Servisu Ministeriu Saude (MS) Odete Viegas, rekonese kestaun ida ne’e tanba iha klinika privadu ne’e selu.

Maske nune’e, nia hateten governu iha komitmentu bo’ot atu fornese atendementu saude ne’ebe diak ho gratuita ba ema hotu.

“Atendementu gratuita la signifika ema sira ne’e la profesional, tanba pesoal saude sira iha ospital ne’e kualifikadu hotu, so ke atitude ema ida-idak nian la hanesan,” nia hateten. 

Nia rekonese, dala ruma mosu mal tratamentu iha ospital sira, karik balun tanba problema individu, maibe ministerio fo hanoin nafatin pesoal saude sira atu labele lori problema uma ba servisu fatin. 

Kona ba kualidade aimoruk iha klinika privadu no publiku, nia dehan aimoruk hotu hanesan deit, depende ba pasiente sira hemu aimoruk tuir reseita ne’ebe mediku fo, entaun moras bele diak, sela’e maka sei hamosu fali resistensia aimoruk iha isin.

“Tenke fo konfiansa ba governu liu –liu sentru no postu saude sira, tanba imi sei la gasta buat ida,” nia hateten. 

Nia dehan, ministerio sei esforsu nafatin atu melhora diak liu tan fasilidade saude publiku sira hotu inklui rekursu humanu hodi fornese atendementu ne’ebe kualidade ba povu ho gratuita tuir lei haruka.

The Dili Weekly