ME: Persentajen Labarik Asesu Ba Pre-escolar Ki’ik

Tuir dadus Ministerio Edukasaun nian hatudu katak labarik idade 3-5 pursentu 15 (15%) deit mak asesu ba iha ensino pre-escolar, tanba ezistensia ensino pre-escolar la barak no maioria iha Dili.

Vise Ministra Edukasaun, Dulce de Jesus Soares hateten dezenvolvimentu (mentalidade no intelektual) labarik ida nian hahu husi pre-escolar, tanba ne’e importante atu investe iha ensino ida ne’e atu prepara labarik sira ba futuru. 

“Estudu sentifiku hatudu ema sukat literasia no numerasia iha ensino baziku, la'os ensino sekundario tanba ne’e se laiha pre-scolar ne’ebe diak sei laiha mos ensino baziku no sekundario ne’ebe diak,” nia hateten iha salaun Delta Nova, Dili. 

Governu seidauk iha kapasidade atu estabelese ensino pre-escolar iha fatin hotu, maibe nia dehan nafatin esforsu servisu hamutuk ho agensia international sira hodi dezenvolve programa sentru komunidade hodi fo oportunidade ba labarik sira aprende. 

Labarik barak iha area rural, nia dehan hahu asesu edukasaun bainhira idade 7 tanba sira lahetan oportunidade atu asesu edukasaun sedu. 

No barak hasoru difikuldade durante prosesu aprendizajen iha primeiru siklu ensino baziku (klase I-III), tanba barak seidauk hatene lee no hakerek. 

Tinan ne’e (2016), agensia international Unicef fo apoiu tekniku no fundus ba governu Timor-Leste (direita) ba iha organizasaun Fundasaun Alola hodi implementa projetu pre-escolar alternative iha munisipio Viqueque no Ermera.

“Ida ne’e mak esforsu ne’ebe governu halo atu labarik sira ne’e labele lakon sira nia direitu asesu ba edukasaun sedu,” nia hateten.

Pre-escolar alternative ida ne’e, nia dehan la'os politika formal Ministerio Edukasaun nian maibe projetu husi agensia dezenvolvimentu sira nian, governu so apoia livrus no ekipamentus balun hodi supporta prosesu aprendizajen. 

Nia informa, pre-escolar alternative ne’e laiha edifisio proprio maibe uza komunidade nia uma (espasu) hodi hala'o prosesu aprendizajen hanesan hanorin kanta, pinta, konese letra no lee istoria. 

Prezidente asosiasaun feto munisipio Viqueque, Veronica Belo apresia ho programa ida ne'e tanba liu husi programa ne’e bele eduka sedu labarik sira.

“Programa ne’e diak tebes, tanba ita eduka ema hahu husi ki’ik signifika katak ita prepara ona ema ba futuru nasaun ne’ebe nabilan,” nia hateten. 

Nia fiar, katak ho programa estimulasaun sedu ba labarik ne’e bele prevene ona violensia bazeia ba jeneru no isin rua sedu iha futuru, tanba sira aprende respeita malu hahu kedas husi idade ne’ebe ki’ik. 

Iha projetu ida ne’e Fundasaun Alola konsege estabelese sentru pre-escolar alternative hamutuk 138 iha munisipio rua ne’e no kuaze labarik rihun 200 mak benefisia husi programa ne'e.

The Dili Weekly