DILI: Performa
hosi Kantór Timor-Leste iha Dangdut Akademia Asia 2, Maria Vitoria no Gerson
Oliveira kontinua hetan apresia. Agora, mai hosi Uma Fukun, Parlamentu
Nasionál.
Deputadu
Francisco Branco dehan, Maria Vitoria ho Gerson Oliveira simboliza duni
potensia Timór oan iha Dangdut Akademi Asia 2 iha Indonesia.
"Sira
nain rua, merese duni sai embaixadór musika TL nian iha mundo internasionál.
Ha'u hakfodak tebes kuandu Maria Vitoria bele kanta musika lian Java nian.
Labarik na'in rua ne'e, iha potensia duni," hateten Deputadu Francisco
Branco ba jornalista iha Parlamentu Nasional, Sesta (18/11).
Deputadu
hosi bankada Fretilin ne'e afirma, Maria no Gerson hatudu investimentu bo'ot
tebes ba Timor-Leste. Nia dehan, Maria ho Gerson fó mós mensajem ba nasaun
ASEAN sira katak Timor-Leste iha duni
potensia.
"Maria
no Gerson bele lori TL, para adere lalais nu’udar membros nasaun ASEAN,"
deputadu ne'e esplika.
Iha
fatin hanesan, deputada Maria Lourdes Bessa hosi bankada Partidu Demokrátiku,
hato’o ninia sentimentu orgulho, bainhira haree kantór Timór oan nain rua,
hatudu sira nia talentu iha mundu muzika internasionál.
“Labarik
na'in rua ne'e, potensia tebes nu'udar Timór oan, iha kontestu muzika
internasionál. Estadu tenke fó apoiu ba sira na'in rua,” nia hateten.
Bessa
dehan, liuhosi Maria Vitoria no Gerson Oliveira nia partisipasaun iha Akademia
Dangdut Asia 2, hamorin ona Timor-Leste nia naran.
"Ne'e
orgullu bo'ot tebes ba ita hotu nu'udar Timór oan," deputada ne'e afirma.
(*)
Tomé
Amado - Editór: Alexandre Assis - Ola Timor
Foto:
Kantór TL iha Dangdut Akademia Asia 2, Maria Vitoria ho Gerson Oliveira tuir
Deputadu Francisco Branco merese duni atu sai embaixadór muzika TL iha mundu
internasionál. (Foto/Instagram #Gersonoliveira_fansclubind)
Sem comentários:
Enviar um comentário