Polisia Investiga Hela Motivu hosi Carlos Nia Mate

DILI - Komandu Polísia Nasionál Timor Leste munisípiu Baucau nian sei investiga hela motivu hosi Carlos Nicolau nia mate, iha área Triloka nian, tanba kronolojia hosi kazu ne’e seidauk klaru.

Komunidade aldeia Makadai, suku Bucoli, parte área Triloka, Carlos Nicolau sai hosi uma komesa iha loron Kinta (10/11), komunidade sira hetan fali mate isin monu tun iha rai naruk besik mota aldeia refere nian.

Matebian Carlos Nicolau ho idade 65, komunidade sira hetan iha loron Tersa (15/11) tuku 08:15 oras Timor Leste iha aldeia Makadai.

 Sasin Sebastião Belo Soares hetan mate isin dehan, nia ba buka Bibi maka horon dois, entaun nia la’o besik ba rai naruk hateke tun ba mate isin ida maka latan hela nia ulun tun ain sa’e hela.

 “Ha’u hetan tiha ha’u halai fila ba fó hatene ba komunidade sira hodi ba haree mate isin ne’e sé loos, entaun ami ho família sira ne’e ba haree katuas Carlos maka monu tun hela ba rai naruk ne’e,” dehan Sebastião ba Timor Post liu hosi via telefone, Tersa (15/11).

 Adelina da Costa nudar oan dehan, nia pai la’o sai hosi uma iha Kinta (10/11) atu ba Kaisidu, vizita nia feton sira iha ne’ebá, maibé loron lima nia laran ona la-fila uma maka sira ba buka tuir, ikus mai hetan fali nia mate isin iha rai naruk.

 “Katuas sai ba hatete ami atu ba nia feton sira iha Kaisidu ne’e iha Kinta, maibé ami hein loron lima nia laran la mai maka ami ba buka tuir to’o ita nia maluk sira hetan nia mate hela iha rai naruk ne’ebá, hau la hatene keta nia maka monu tun ba ka oinsá,” dehan Adelina.

Nia dehan, parte polísia sira to’o ona ba sira sei entrega ba nune’e karik ba hala’o prosesu autópsia hodi nune’e bele hatene nia motivu hosi akontesimentu ne’e. (way)  

Timor Post