Julgamentu ba eis-ministra timoroan sei hahú fila fali iha loron 25 fulan-novembru

Julgamentu ba eis-ministra timoroan na’in rua sei hahú fila fali iha semana oin  maski seidauk hatene karik argida ida, eis-titular Finansa, Emília Pires, marka prezensa  ka seidauk fila mai  Timor-Leste hafoin  tratamentu médiku iha estranjeiru.

Emília Pires, ne’ebé sei julga  ba  prosesu sira ne’e hotu ho eis-vise-ministra Saúde, halo opera ba nia ain ida iha Austrália loron 05 novembru liubá no agora iha Portugál " tanba motivu saúde", tuir  konfirmsaun ba Lusa ninia defeza.

Eis-ministra ne’e tuir loloos tenki fila mai  Timor-Leste iha  finál fulan-outubru, hafoin hala’o  deslokasaun ida ba estranjeiru, ne’ebé  reprezenta Estadu timoroan no autoriza hosi Tribunál Díli.

Durante viajen ne’e, problema  saúde uluk nian agrava fila fali, tuir defeza, obriga hetan intervensaun sirúrjika ho kuidadu ba ninia saúde, tanba ne’e husu ba Tribunál Díli atu hanaruk tan  autorizasaun ba ninia permanénsia iha estranjeiru.

"Iha Portugál tanba kestaun saúde no tribunál hetan ona hosi defeza", haktuir fonte ne’e.

Julgamentu ba Emília Pires no Madalena Hanjam tama ona ba  sentensa maibé adiamentu koletivu juíz sira nian ikus mai  hamosu impedementu  ba ida ne’ebé dahuluk  atu rona ninia deklarasaun finál, halo hela  vizita ba estranjeiru.

Defeza dispensa ona ninia direitu hodi marka prezente ba deklarasaun finál – buat ida ne’ebé to’o agora Tribunál Díli kontinua husu – solisita katak sei laatraza ba leitura sentensa nian, ne’ebé kontinua marka nafatin.

Tribunál Díli ikus mai fó nafatin  prazu loron lima ba Emília Pires atu fila mai  Timor-Leste, prazu ne’ebé sei remata iha inísiu  fulan-novembru.

Iha  sesaun loron 25 oin mai antesipa katak koletivu juíz sira karik pronunsia kona-ba dilijénsia oioin hosi defeza inklui ida, ne’ebé entrega ona, husu nafatin tempu ba legalizasaun dokumentu sira ne’ebé konfirma kondisaun saúde argida nian.

kona-ba  Pires nomós Hanjam kontinua hala’o  funsaun oioin iha Estadu timoroan, badahuluk iha ámbitu Grupu G7+ no ida seluk hanesan  Ordenadora Nasionál Adjunta, servisu integradu ida iha Ministériu Negósius Estranjeirus, responsável, entre funsaun seluk, ba ligasaun Governu ho parseiru dezenvolvimentu.

Argida na’in rua  iha medida koasaun lahanesan tanba  Emília Pires hetan Termu Identidade no Rezidénsia (TIR) no bandu sai hosi territóriu sein jautorizasaun hosi Tribunál no Madalena Hanjam hetan deit TIR lapresiza informa ba tribunál sai hosi nasaun, ho esesaun karik viajen prolonga liu loron  15.

Fonte defeza Hanjam nian konfirma ba Lusa katak argida halo deslokasaun ba estranjeiru entre 03 no 11 dezembro hafoin viaje ida  programadu ba inísiu fulan hetan impedimentu tanba  desizaun Austrália nian rekuza ninia vistu.

"Maski laiha kualkér impedimentu ruma, Austrália reza fó vistu ba Hanjam, alega katak lafó tanba nia iha prosesu judisiál nia klaran. Lakomprende  rekuza vistu ne’e",  haktuir  fonte defeza.

Emília Pires no Madalena Hanjam hetan akuzadu irregularidade ba sosa kama ospitál atus resin ho kontratu adjudikadu ba empreza nia laen, ho konluiu entre na’in tolu ba konkretizasaun negósiu ne’e, ho valór dólar rihun 800.

Iha  alegasaun finál, Ministériu Públiku entrega ona akuzasaun hanesan prova no husu pena prizaun  tinan 10 ba argida na’in rua.

Alegasaun finál defeza nian marka  ho krítika ba Ministériu Públiku no forma ba prosesu ne’ebé la’o  dezde inísiu, iha 2012.

Julgamentu hahú ona durante tinan ida no rona ona testemuña sanulu liu, inklui eis-Prezidente Xanana Gusmão no José Ramos-Horta nomós eis-primeiru-ministru Mari Alkatiri.

SAPO TL ho Lusa