Família Mak Dalan Lia-Loos

DILI, (ANTIL) – Pastora Protestante iha Timor-Leste, Luisa Gamboa hatete, bainhira joven sira mak metin ho evanjellu, sei la-fasil monu ba sala, sira ne’e presiza eduka liuhosi família tanba família mak dalan ba lia-loos.

“Igreja protestante sempre hato’o evanjellu ba ema hotu, liu-liu juventude sira oinsá mak ema hotu bele fiar ba maromak, nune’e bele la’o tuir maromak nia dalan tanba, fiar metin nafatin sei determina ita ba lalehan”, Pastora hatete iha Ótel Novo Turizmu, Sesta, (18/11).

Nu’udar kriatura maromak, bainhira sai fiar nain, signifika sei la’o tuir maromak nia dalan. Tanba ne’e, evanjellu importante hodi hato’o ba ema hotu, liu-liu juventude sira tenke buka uluk maromak, nune’e bele loke dalan no prepara futuru ne’ebé di’ak.

Parte igreja protestante nia objetivu oinsá mak lori ema atu bele koñese maromak liu hosi moris, lia-loos iha maromak nia futar oin. Tanba, igreja protestante la’os atu haruka ema hosi relijiaun seluk atu tama ba protestante.

“Importante ba protestante mak kualker se de’it mak hasoru, sempre haklaken evanjellu tanba, bainhira koñese maromak, entaun nia tauk ona atu halo buat ne’ebé mak a’at hanesan droga, hemu tua no seluk tan”, Pastora protestante hatutan.

Bainhira maromak nia liafuan domina ona, entaun ba ne’ebé de’it sempre iha hanoin no fuan ba buat ne’ebé di’ak no a’at. Evanjellu ne’e importante tanba, joven sira fasil atu monu ba sala maibé bainhira kuda ona liafuan entaun sira sei la-hakat sala iha sira nia moris no sira sei eduka tuir forma família. (jornalista: Zezito Silva; editora: Rita Almeida)

Foto: Ilustrasaun familia kristaun.