ONU akuza Austrália hamenus direitu ema nian ba imigrante ilegal sira

Polítika imigrasaun Austrália nian kontribui daudaun ba hamenus Direitu Ema sira nian ba ema sira ne'ebé laiha dokumentu sira no la halo tuir lei internasional, alerta hosi ONU iha loron-sesta ne'e.

Relator espesial ONU nian François Crepeau kritika ona uzu hosi Mariña australianu hodi hadook ró sira ne'ebé lori imigrante sira ne'ebé hakarak to'o iha tasi-ibun Austrália no Nauru, nasaun ida iha Pasífiku ne'ebé simu sentru detensaun ida.

"Polítika migratóriu balun Austrália nian estraga daudaun Direitu Ema sira nian ba imigrante sira no la halo tuir nia obrigasaun humanitáriu sira", hatete hosi relator iha komunikadu.

Crepeau felisita katak nasaun simu ona refujiadu síriu hamutuk rihun 12 no nia desizaun hodi aumenta ba kuato anual 18.750 hosi refujiadu sira hahú hosi tinan 2018, maibé iha dúvida kona-ba dureza iha tratamentu ba ema sira ne'ebé hakarak tama ilegal iha nasaun.

Espesialista indika ona katak detensaun tenki hanesan proporsional no uza hanesan rekursu ikus no rekomenda ona atu tau limiti tempu ida hafoin hasoru ho ema sira ne'ebé kastigu ona iha tinan ualu liubá.

Crepeau hatete katak Austrália hanesan responsável ba tratamentu ne'ebé maka imigrante sira simu iha Nauru, ne'ebé organizasaun sira ne'ebé defende direitu ema nian hato'o kesar katak kondisaun prekáriu ne'ebé ema sira ne'e hasoru hanesan "aat tebes".

"Austrália sei protesta beibeik bainhira nia sidadaun sira simu tratamentu hanesan iha nasaun sira seluk no liuliu bainhira labarik australianu sira hetan tratamentu hanesan ne'e", hatete hosi Crepeau.

Austrália uza, hahú tinan 2012, sentru sira ne'e hodi prosesa pedidu sira azilu hosi imigrante sira ne'ebé hafoin, bainhira hetan rekoñesimentu ba estatutu refujiadu nian, desloka ba nasaun datoluk sira ne'ebé estabelese iha akordu sira.

Imigrante sira ne'e barak halai hosi konflitu sira hanesan hosi Afeganistaun, Darfur, Pakistaun, Somália ho Síria, no sira seluk halai hosi diskriminasaun ka hosi kondisaun apátridu, hanesan ema minoria sira rohingya hosi Birmánia ka bidune, hosi rejiaun Golfo nian.

SAPO TL ho Lusa