KRF Propoen Lei Kazamentu

DILI, (ANTIL) – Komisária Permanente ba Reforma Lejislativa (KRL) iha setór justisa, Melisa Silva Caldas hatete, Komisaun Reforma Lejistaliva (KRL) propoen ba Ministériu Justisa (MJ) envezde halo alterasaun ba kódigu sivíl, di’ak liu hasai lei kazamentu nian ida.

Melisa Silva ba ANTIL, Kinta, (17/11) iha Timor Plaza relata, MJ propoen alterasaun ba kódigu sivíl nune’e husi KRL halo diskusaun téknika no propoen ba MJ katak la-fasil liu ba sidadaun ne’ebé hakarak kaben duké buka direitu no devér iha kódigu sivíl ho artigu barak tanba sá la-halo lei ida ne’ebé espesífiku ba kazamentu.

“Lei espesífiku ida ne’ebé fasil ho artigu hira ita fahe ba sidadaun, ita esplika lalais liu tanba, lori kódigu sivíl tenke esplika kódigu tomak no kódigu la’ós kona-ba kontratu, obrigasaun, rai no buat barak ne’ebé sidadaun hotu la-hatene”, Melisa katak.

KRL halo rekomendasaun depois iha podér lejislativa husi governu no parlamentu sira mak iha inisiativa atu halo tuir rekomendasaun ne’ebé mak sente katak di’ak.

“Ita hatene katak realidade ema hotu kaben soké ema hotu labele hatene kódigu sivíl, jurista ida mós la-konsege domina kodigu sivíl tomak. Sé ita halo alterasaun bainhira ita ko’alia ba ema sidadaun ida artigu ida ne’e altera hanesan ne’e, ba ema sidadaun normál la-konsege komprende ida ne’e, nia hakarak hatene nia direitu no devér mak saida”, Melisa haktenik.

Nune’e, rekomendasaun husi KRF sempre iha sentidu katak atu propoen lejislasaun ne’ebé bele asesivel ba sidadaun sira hotu tanba, sira ladún hatene.

“Entaun ita hakarak atu lejislasaun ne’ebé iha daudaun ita hakarak atu hadi’a, fasilita para ema hotu bele komprende. Tanba ne’e mak ami sente katak duké ita altera artigu barak iha kódigu sivíl nusá ita la-halo de’it lei ida ho artigu balun ne’ebé esplika saida mak ema tenke halo no labele”, Melisa sujere.

Melisa haktuir, husi parte justisa haree katak ne’e opsaun ida tanba hakarak atu fasilita sidadaun no opsaun ne’ebé dalaruma bele di’ak duni. “Ami hatama rekomendasaun iha relatóriu espesializada no ami fó fila ba sira mak sei tetu”, katak tan. (jornalista: Maria Auxiliadora; editora: Rita Almeida)

Foto: Komisária Komisaun Reforma Legislativa, Melisa Silva Caldas. Foto ANTIL/Egas Cristovão